ԵՐԵՎԱՆ, 16 հունվարի — Sputnik. ՀՀ ԱԺ տնտեսական հարցերի մշտական հանձնաժողովը հավանություն տվեց «Հարկային վարչարարություն իրականացնելու նպատակով ԱՊՀ մասնակից պետությունների միջև էլեկտրոնային եղանակով տեղեկություն փոխանակելու մասին» արձանագրությանը։
«Արձանագրությունը ենթադրում է, որ ԱՊՀ երկրների հարկային մարմինները տեղեկատվության փոխանակում կիրականացնեն իրավաբանական և ֆիզիկական անձանց որոշ եկամուտների վերաբերյալ», – օրինագիծը ներկայացնելիս ասաց ՊԵԿ փոխնախագահ Միքայել Փաշայանը։
Նրա խոսքով` փաստաթուղթը թույլ կտա ապահովել բարեփոխումների անցկացում հարկային վարչարարության ոլորտում և խուսափել կրկնակի հարկումից։
Քանի որ Հայաստանն էլեկտրոնային ձևաչափի է վերածում փաստաթղթերը երկրի ներսում, շահագրգռված է, որ նույն գործընթացը տեղի ունենա ԱՊՀ երկրների հետ տեղեկատվության փոխանակման ժամանակ։
Ինչ վերաբերում է Ադրբեջանին, ապա ԱՊՀ շրջանակում փաստաթղթեր ընդունելու դեպքում ստանդարտ է սահմանվել, որի համաձայն Բաքուն հանդես է գալիս վերապահումով, իսկ Երևանը` հատուկ կարծիքով։
«Հայաստանի կողմից Ադրբեջանի նկատմամբ որևէ իրավունք, պարտավորություն և կետ չի կիրառվի, մինչև չլուծվի արցախյան հակամարտությունը, որը Ադրբեջանի էթնիկ զտումների քաղաքականության և ԼՂՀ ժողովրդի նկատմամբ ռազմական ագրեսիայի հետևանք է», – երկրի դիրքորոշումն ընթերցեց Փաշայանը։
ԱՊՀ երկրների տոնածառերի «բարձր» տասնյակը. ո՞ր տեղում է Հայաստանը
Նշենք, որ 2018 թվականի նոյեմբերի 2-ին Աստանայում ստորագրված արձանագրության վավերացումը պետք է նպաստի հարկերից և տուրքերից խուսափելու կանխմանը, ինչպես նաև նվազագույնի հասցնի բյուրոկրատական ընթացակարգերը, նպաստի պետությունների հետ առևտրատնտեսական համագործակցության հետագա զարգացմանը։
Հանձնաժողովում օրինագիծը հաստատվելուց հետո այն կքննարկվի ԱԺ լիագումար նիստում։
