ԵՐԵՎԱՆ, 16 հունվարի — Sputnik. Երևանի քաղաքապետարանում ՀՀ վարչապետ Նիկոլ Փաշինյանի հետ ավելի քան 2 ժամ տևած հանդիպումն ընթացիկ աշխատանքային հանդիպում էր։ Վարչապետին ճանապարհելուց հետո լրագրողներին այս մասին հայտնեց Երևանի քաղաքապետ Հայկ Մարությանը։
«Հայերը տեղ են գնում երթուղայինով». ռեալիթի շոու, որը ծիծաղելի կլիներ, եթե իրական չլիներ
Հարցին, թե ինչ խնդիրներ են քննարկվել հանդիպման ընթացքում, Մարությանը պատասխանեց. «Մենք քննարկում էինք ոչ թե խնդիրները, այլ դրանց լուծման հնարավոր ճանապարհները։ Կան հրատապ խնդիրներ, որոնք արդեն լուծվել են, կան ոչ այնքան հրատապ խնդիրներ, որոնք այս պահին լուծման ճանապարհին են»,– ասաց նա` հավելելով, որ 2 ժամվա ընթացքում, բնականաբար, բոլոր հարցերին անդրադառնալ չէին կարող։
Առավոտը` մեր երթուղայիններում. զվարճալի տեսանյութը «սպանել է» համացանցը
Անդրադառնալով ապօրինի կառուցված ու տեղադրված սրճարանների ու կրպակների ապամոնտաժման ընթացքին, Մարությանը հայտնեց, որ գործընթացը շարունակվում է, դրանք գույքագրվում ու անհրաժեշտության դեպքում ապամոնտաժվում են։ Իսկ ազատված տարածքները վերադարձվում են այգիներին։
Ինչ վերաբերում է տրանսպորտի խնդրին, Երևանի քաղաքապետը վստահեցրեց, որ ինչպես և խոստացվել էր, մինչև տարեվերջ 100 ավտոբուս ձեռք կբերվի, գուցե և ավելի։ Բայց խոստացված տրանսպորտային ցանցը նույնիսկ 2021–ին դեռ պատրաստ չի լինի։
«Ամբողջ ցանցը, որ անգլիական WYG ընկերությունը գծել է մեզ համար, կարծում եմ` մյուս տարի դեռ չենք հասցնի գործարկել, բայց մասամբ սկսելու ենք աշխատեցնել»,–ասաց Մարությանը։
Հիշեցնենք` այսօր ժամը 18։00-ին մոտ ՀՀ վարչապետ Նիկոլ Փաշինյանն առանց նախապես հայտարարելու եկել էր Երևանի քաղաքապետարան, որտեղ ավելի քան 2 ժամ փակ հանդիպում է ունեցել Երևանի քաղաքապետ Հայկ Մարությանի հետ։
«Կյանքի ու մահվան կռիվ» Երևան-Դիլիջան երթուղայինում կամ ինչ տպավորությամբ կգնա զբոսաշրջիկը
