ԵՐԵՎԱՆ, 14 հունվարի — Sputnik. Ռուզան Մանթաշյանն իսկապես պետք է հանդես գար Դրեզդենում անցկացվող SemperOpernball փառատոնի բացմանը, սակայն հունվարի 10-ին նրա ելույթը չեղարկվել է։ Այս մասին հայտարարություն է տարածել Agence Massis Opèra ֆրանսիական համերգային գործակալությունը, որի հետ աշխատում է Մանթաշյանը։
«Նրա ելույթը չեղարկելու պահանջ է ներկայացրել ադրբեջանցի երգիչ Յուսիֆ Էյվազովը»,– գրված է հայտարարության մեջ։
Երեկ տեղեկություն տարածվեց, որ օպերային երգչուհի Աննա Նետրեբկոյի ամուսինը` ազգությամբ ադրբեջանցի Յուսիֆ Էյվազովը, հրաժարվել է Դրեզդենի օպերային փառատոնի բացմանը նույն բեմում ելույթ ունենալ սոպրանո Ռուզան Մանթաշյանի հետ` պատճառաբանելով երգչուհու հայ լինելը։
Փառատոնի կազմակերպիչներն էլ հայտարարություն տարածեցին` վստահեցնելով, որ Էյվազովը նման բան չի ասել, իսկ Մանթաշյանն էլ ընդհանրապես հրավիրված չի եղել փառատոնին։ SemperOpernball–ի կազմկոմիտեն նշեց, որ հավանաբար հայ երգչուհուն ներկայացնող Massis Opèra ֆրանսիական համերգային գործակալության հետ թյուրըմբռնում է եղել։
Անձամբ Էյվազովը նույնպես հայտարարեց, որ ինքը Ռուզան Մանթաշյանի ելույթի չեղարկում չի պահանջել և հիշեցրեց, որ բազմաթիվ անգամ ելույթ է ունեցել հայ երգիչների հետ, օրինակ` Մարիա Գուլեգինայի և Գևորգ Հակոբյանի։
Ազգությամբ ադրբեջանցի, հոգով՝ հայ. էջմիածնեցի Ալիևի փառքի ճամփան
Պատասխան հայտարարության մեջ Massis Opèra–ն հայտնում է, որ թյուրըմբռնումը փորձում են վերագրել իրենց, այնինչ ավելի ճիշտ կլինի թյուրըմբռնումը փնտրել փառատոնի կազմակերպիչների շրջանում։ Գործակալությունը պնդում է, որ դեռ 2019 թվականի սեպտեմբերին իրենք Դրեզդենից հարցում են ստացել այն մասին, թե Ռուզան Մանթաշյանը կարո՞ղ է երգել Semper Opernball–ի բացմանը։
«Կողմերը շուրջ 15 նամակ են գրել միմյանց` կարգավորելով տեխնիկական և ֆինանսական հարցերը։ 2020 թվականի հունվարի 10-ին մենք ևս մեկ նամակ ստացանք, որում մեզ հայտնում էին Ռուզան Մանթաշյանի ելույթը չեղարկելու մասին, քանի որ պարոն Էյվազովը չի ցանկացել նրա հետ երգել։ Դա, ամենայն հավանականությամբ, դժվար կացության մեջ է դրել կազմակերպիչներին, բայց մենք պատասխանատվություն չենք կրում այս իրավիճակի համար, որը բացասական է նաև մեր արտիստի համար։ Մենք չենք կասկածում, որ փառատոնը բաց է բոլոր ազգերի ներկայացուցիչների համար», – գրված է հայտարարության մեջ։
Որպես ասվածի ապացույց` գործակալությունը ներկայացրել է Wirtschaft in Sachsen («Արվեստը Սաքսոնիայում») գերմանական թերթի` դեկտեմբերի 27-ի հրապարակումը։
«Ադրբեջանցի տենոր Յուսիֆ Էյվազովի կողքին հանդես կգա նաև հայ սոպրանո Ռուզան Մանթաշյանը։ Նախատեսվում է նաև ռուս վիրտուոզ ջութակահար Պավել Միլյուկովի մասնակցությունը», – գրված է հոդվածում։
SemperOpernball–ն առաջին անգամ կազմակերպվել է 1925 թվականին և 8 անգամ անցկացվել մինչև 1939 թվականը։ 2006 թվականին փառատոնը վերականգնվել է և այդ ժամանակից ի վեր անցկացվում է ամեն տարի։
«Հայ հարևանս էլ էր համեղ պատրաստում». ադրբեջանցի լրագրողների տպավորությունները` Արցախից
