ԵՐԵՎԱՆ, 14 հունվարի — Sputnik. 2019 թվականին Հայաստան է ժամանել 5 միլիոն 339 հազար 796 մարդ: ՀՀ վարչապետ Նիկոլ Փաշինյանը, ջնջելով զբոսաշրջության վերաբերյալ իր նախորդ ֆեյսբուքյան գրառումը, նոր տվյալներ է ներկայացրել։
Համաձայն նրա հրապարակման`
2018 թվականին Հայաստան է ժամանել 4 միլիոն 785 հազար 875 մարդ:
2017-ին Հայաստան է ժամանել 4 միլիոն 373 հազար 117 մարդ:
2017-ի համեմատ 2019-ին Հայաստան է ժամանել 966 հազար 679-ով, կամ 22.1 տոկոսով ավել մարդ:
«Նշեմ, որ 2019 թվականի արդյունքներով Հայաստանից մեկնողների թիվը 9 հազար 467-ով ավել է եղել ժամանողների թվից»,–գրել է վարչապետը:
Նրա դիտարկմամբ` 2018 թվականի արդյունքներով Հայաստանից մեկնողների թիվը ժամանողներից ավել է եղել 11 հազար 882-ով:
«Նշեմ նաև, որ նախորդ գրառումս որ ջնջեցի, ամբողջությամբ ճիշտ էր, պարզապես վերաբերվում էր չորրորդ եռամսյակի՝ հոկտեմբեր, նոյեմբեր, դեկտեմբեր ամիսների տվյալներին»,–մեկնաբանել է Փաշինյանը:
Նա տեղեկացրել է նաև, որ այս հաշվարկում միևնույն անձի բազմակի այցելությունները հաշվառված չեն:
Հիշեցնենք, որ իր տարեկան ամփոփիչ ասուլիսի ժամանակ ՀՀ էկոնոմիկայի նախարար Տիգրան Խաչատրյանն ասել էր, որ Հայաստանն ավելի գրավիչ ուղղություն է դարձել Ռուսաստանի, Վրաստանի և Իրանի զբոսաշրջիկների համար։
Նշենք, որ 2020թ–ին Հայաստանում զբոսաշրջիկների թիվը կարող է աճել, քանի որ հունվարից հանրապետությունում սկսում են գործել եվրոպական լոուքոսթեր ավիաընկերություններ Ryanair–ը և Wizz Air–ը։
