ԵՐԵՎԱՆ, 14 հունվարի — Sputnik. Էկոնոմիկայի նախարարության աշխատակիցներին տրված պարգևավճարները հավասար են եղել նրանց տարեկան աշխատավարձի 1/3-ին։ Այսօր լրագրողների հետ հանդիպմանը հայտնեց ՀՀ էկոնոմիկայի նախարար Տիգրան Խաչատրյանը։
«Այսինքն` հանրագումարով էապես չեն շեղվել այն սահմանաչափերից, որոնք սահմանված են գերատեսչության համար ընդհանուր կարգով։ Մեկը կարող է ավելի խրախուսված լինել, քան մյուսը։ Դա հենց պարգևավճարի առանձնահատկությունն է»,– ասաց Խաչատրյանը։
Նրա խոսքով` պարգևավճարների հարցում երկու մոտեցում կա`վճարել բոլորին հավասար և կիրառել տարբերակված մոտեցում։ Նախարարն ասաց, որ ինքը` որպես կառույցի ղեկավար, ընտրել է երկրորդ սկզբունքը։
«Ես սկզբունքորեն դեմ եմ առաջին մոտեցմանը և կարծում եմ, որ պարգևավճարը պետք է վճարվի այն աշխատակիցներին, որոնք առանձնահատուկ ջանքեր են ցուցաբերում, առանձնահատուկ աշխատանքային արդյունավետություն ունեն և նման չեն միջինին»,– ասաց Խաչատրյանը։
Այս սկզբունքի կիրառմամբ, նրա մեկնաբանությամբ, նախարարությունում եղել են աշխատակիցներ, որոնց ստացած պարգևավճարները տարվա ընթացքում գերազանցել են աշխատավարձի չափը։
Քաղաքապետը կրկին պարգևատրել է աշխատակիցներին. ծախսվել է ավելի քան 65 մլն դրամ
Իսկ թե որ աշխատակիցը որքանով պիտի պարգևատրվի` որոշում են նախարարի տեղակալները։
Տիգրան Խաչատրյանը նշեց, որ Ամանորից առաջ` դեկտեմբերին, խրախուսվել են բոլորը` անկախ աշխատանքի որակից։
«Նախարարի տեղակալների հետ խորհրդակցելով մենք որոշեցինք, որ այդ ամսվա ընթացքում բոլորը պետք է ստանան, բացառություններ չենք արել»,– ասաց Խաչատրյանը։
Իսկ տարվա ընթացքում, նրա խոսքով, պարգևատրվել է նախարարության աշխատակիցների ավելի քան 80 տոկոսը։ Դրանցից 20 տոկոսն, ըստ նախարարի` բավականաչափ բարձր, մյուսները` միջին չափով։
Հիշեցնենք` 2019թ.–ի հոկտեմբերին մամուլում տեղեկություններ էին հայտնվել այն մասին, որ վարչապետ Նիկոլ Փաշինյանի` հուլիսին տված գաղտնի հանձնարարականով` նախարարների, փոխնախարարների և նախարարությունների գլխավոր քարտուղարների աշխատավարձերն էականորեն բարձրացվել են։
Հոկտեմբերի 23-ին ԱԺ–ում վարչապետը հայտարարեց, որ ոչ բոլոր նախարարների ու փոխնախարարների աշխատավարձերն են բարձրացել. ոմանցը իջել է։
«Այո, պարգևավճարներ լինելու են». Ջանջուղազյանը չգիտի` այս տարի՞ էլ հարցն աղմուկի կվերածվի
Ինչ վերաբերում է գաղտնիությանը` Փաշինյանը նշեց, որ դա ընթացակարգի հարց է։ Նախկինում վարձատրություններին վերաբերող բոլոր որոշումները կրում էին «գաղտնի» գրիֆը, որն այսօր էլ իներցիայով շարունակվում է։
Բայց, ըստ վարչապետի` որոշումն իրականում գաղտնի չի ընդունվել, այլ 1 տարի առաջ, 2019թ.–ի բյուջեի նախագծի քննարկման ժամանակ, հրապարակային։
2020թ.–ի բյուջեով պետական համակարգի պարգևավճարների ֆոնդը հաստատվել է աշխատավարձերի 30 տոկոսի չափով։
«Երանի հոգով աղքատներին». Կարապետյանը կարծում է, որ պարգևավճարների թեման շահարկվում է
