ԵՐԵՎԱՆ, 14 հունվարի – Sputnik. Մարդու իրավունքների պաշտպանի հանձնարարությամբ՝ աշխատակազմի ներկայացուցիչներն այսօր այցելել են «Նաիրի» բժշկական կենտրոնի ինտենսիվ թերապիայի և վերակենդանացման բաժանմունքում գտնվող Մանվել Գրիգորյանին, առանձնազրույց ունեցել նրա և նրա փաստաբանների հետ: Այս մասին հայտնում է ՀՀ մարդու իրավունքների պաշտպանի մամուլի ծառայությունը։
Նշվում է, որ Մանվել Գրիգորյանի առողջական վիճակին առնչվող հարցերը քննարկվել են նրա բուժումն իրականացնող բժշկի հետ: Առանձնազրույցի ընթացքում Մանվել Գրիգորյանի գիտակցությունը եղել է պարզ։
Բժիշկների գնահատմամբ՝ Գրիգորյանի առողջական վիճակը կայուն ծանր է, նա գտնվում է բժիշկների մշտական հսկողության տակ և ստանում անհրաժեշտ դեղորայքային բուժում:
Ըստ ՄԻՊ տարածած հաղորդագրության` Մանվել Գրիգորյանի առողջական վիճակի և իրավունքների հետ կապված հարցերը գտնվում են Մարդու իրավունքների պաշտպանի ուշադրության կենտրոնում:
Նշենք, որ Մանվել Գրիգորյանի փաստաբան Լևոն Բաղդասարյանն այսօր Sputnik Արմենիայի հետ զրույցում հայտնել էր, որ ԵԿՄ նախկին նախագահ, Ազգային ժողովի նախկին պատգամավոր Մանվել Գրիգորյանին ծայրահեղ ծանր վիճակում տեղափոխել են «Նաիրի» բժշկական կենտրոնի վերակենդանացման բաժանմունք։
Մանվել Գրիգորյանի փաստաբան Արսեն Մկրտչյանն ավելի վաղ Sputnik Արմենիային հայտնել էր, որ գեներալի մոտ հայտնաբերվել է 16-ից ավելի հիվանդություն։
Հիշեցնենք, որ Մանվել Գրիգորյանը մեղադրվում է 6 հոդվածով` ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Նրան մեղադրանք է առաջադրվել 2018 թ. հունիսի 19-ին։
Մանվել Գրիգորյանը դժվարությամբ է տարբերում դեմքերն ու դեպքերը. փաստաբան
2018թ.-ի հունիսի 16-ին կատարված խուզարկություններով, ԱԱԾ–ն Արմավիրի մարզի Արշալույս գյուղի Գրիգորյաններին պատկանող առանձնատներում հայտնաբերել էր 17 606 հատ տարբեր տրամաչափի փամփուշտ, 20 հատ «Փ-1» տեսակի ձեռքի բեկորային մարտական նռնակ, 20 «УЗРГМ-2» տեսակի մարտական պայթուցիչներ, 18 հատ կրակոցներ՝ իրենց բաղկացուցիչ մաս կազմող 13 մեկնարկային վառոդային լիցքերով, հրազեն հանդիսացող 40մմ տրամաչափի «РПГ-7В» տեսակի նռնականետ։
