ԵՐԵՎԱՆ, 12 հունվարի — Sputnik. Ռաուլ Խաջիմբան հրամանագիր է ստորագրել Աբխազիայի նախագահի լիազորություններն ինքնակամ վայր դնելու մասին, հաղորդում է Sputnik Աբխազիան։
Ցուցարարների հետ հանդիպման են դուրս եկել նախկին արտգործնախարարը և խորհրդարանի նախկին պատգամավոր Սերգեյ Շամբան ու կարդացել հայտարարությունը։ Պետական առանձնատան մոտ հավաքվածները բուռն ծափահարություններով են ընդունել լուրը։
Աբխազիայի փոխնախագահ Բարցիցը հայտարարել է, որ Խաջիմբան այդպիսի որոշում է կայացրել, որպեսզի «հանրապետությունում կայունություն պահպանվի»։
Ցուցարարների մի մասը, որոնք արդեն չորս օր է՝ շրջափակել են նախագահի նստավայրը, տեղափոխվել են առանձնատան մոտ, որտեղ գտնվում է Խաջիմբան։
Անվտանգության ծառայությունը թույլ չի տվել հավաքվածներին մտնել պետական առանձնատան տարածք, վիճաբանություն է սկսվել։ Ընդդիմությունը պահանջել է, որպեսզի Խաջիմբան վայր դնի լիազորությունները։
Կիրակի օրը Խաջիմբան հանդիպել է Ընդդիմադիր ուժերի դաշինքի առաջնորդ Ասլան Բժանիայի հետ։ Բանակցություններն ընթացել են ռուսական պատվիրակության անմիջական մասնակցությամբ՝ Ռաշիդ Նուրգալիևի գլխավորությամբ։
Սեպտեմբերին ընդդիմադիրները կասկածի տակ են դրել պետության գործող ղեկավար Ռաուլ Խաջիմբայի հաղթանակը։ Նա առաջ է անցել իր մրցակցից ընդամենը 1 տոկոսով։ Այս տարվա հունվարի 9-ին բողոքի ակցիայի մասնակիցները գրավել են նախագահի աշխատակազմի շենքը և պահանջել Խաջիմբայի հրաժարականը։
Դրանից հետո երկրի Գերագույն դատարանը չեղարկել է սեպտեմբերյան քվեարկության արդյունքները։ Աբխազիայի ԿԸՀ-ը նախագահի կրկնակի ընտրությունը նշանակել է մարտի 22-ին։
