ԵՐԵՎԱՆ, 10 հունվարի — Sputnik. ՀՀ վարչապետ Նիկոլ Փաշինյանը Ջրային կոմիտեի նախագահ Վարդան Մելքոնյանին ազատել է պաշտոնից։ ՀՀ վարչապետի որոշումը հրապարակվել է ՀՀ կառավարության պաշտոնական կայքում։
«Ղեկավարվելով «Հանրային ծառայության մասին» Հայաստանի Հանրապետության օրենքի 9-րդ հոդվածի 7-րդ մասով՝ Վարդան Մելքոնյանին ազատել Ջրային կոմիտեի նախագահի պաշտոնից»,– նշված է որոշման տեքստում:
Մելքոնյանն այդ պաշտոնում նշանակվել էր 2019թ–ի մարտի 29-ին։
Նշենք, որ սա այս տարվա արդեն երկրորդ պաշտոնանկությունն է գործադիր իշխանությունում։
Հունվարի 9-ին վարչապետն աշխատանքից ազատել էր նաև իր մամուլի խոսնակ Վլադիմիր Կարապետյանին։
Հիշեցնենք` 2020թ–ին սպասվող կադրային ջարդի մասին վարչապետն ակնարկել էր կառավարության` 2019թ.–ի դեկտեմբերի 12-ի նիստում։ Փաշինյանը հայտարարել էր, որ պետական համակարգը դիմադրում է հեղափոխությանը, ու խոստացել, որ ջարդելու է այդ դիմադրությունը։
Վարչապետն ասել էր, որ Հայաստանում գրանցված տնտեսական բոլոր ցուցանիշներն ու կոռուպցիայի դեմ պայքարն իրականացվում են ի հեճուկս պետական իրավապահ համակարգերի։
Հաջորդ օրը ՀՀ վարչապետի` այժմ արդեն նախկին մամուլի քարտուղար Վլադիմիր Կարապետյանը լրագրողների հետ զրույցում, մեկնաբանելով Նիկոլ Փաշինյանի հայտարարությունը, հայտարարել էր, որ կադրային ջարդի նախանշաններ դրանում չի տեսնում։
