ԵՐԵՎԱՆ, 9 հունվարի — Sputnik. Զբոսաշրջիկներին մատուցվող ծառայությունների որակը Հայաստանում վերջին 30 տարում գրեթե չի փոխվել։ Այսօր կառավարության նիստում հայտարարեց ՀՀ վարչապետ Նիկոլ Փաշինյանը` հատկապես անդրադառնալով հասարակական զուգարանների բացակայությանը։
«Որքան էլ զավեշտալի հնչի, որ մենք այս հարթակում ստիպված ենք այսպիսի հարցեր քննարկել, այնուամենայնիվ, ՀՀ–ում ամենամեծ պրոբլեմներից մեկը վերաբերում է զուգարանների խնդրին։ Սա քաղաքակրթական կարևորագույն խնդիր է, երբ որ տեսնում ես, որ որևէ տեղ բացված է 5 հարկանի ռեստորան, որտեղ աթոռները ոսկեջրած են, բայց երբ զուգարանի դուռը բացում ես ու ներս ես մտնում, քեզ թվում է, թե ինչ–որ աղետյալ շրջանում ես գտնվում»,– ասաց Փաշինյանն ու նիստին ներկա պաշտոնյաներից հետաքրքրվեց` կա՞ն արդյոք ՀՀ–ում զուգարանների ստանդարտներ։
Հարցին պատասխանեց վարչապետի աշխատակազմի Տեսչական մարմինների աշխատանքների համակարգման գրասենյակի ղեկավար Արթուր Ասոյանը։
Պարզվեց `հիգիենիկ պահանջների վերաբերյալ ստանդարտներ կան, բայց դրանք հիմա փոփոխման փուլում են։
«Մենք նախարարի հետ նախաձեռնել ենք դրանց փոփոխման նախագիծ։ Եթե չեմ սխալվում` առաջիկա մեկ շաբաթվա ընթացքում արդեն կունենանք հաստատված նորմերը, որոնք վերջնական տեսքի բերելուց հետո կանդրադառնանք նաև օենսդրական կարգավորումների փոփոխություններին»,– ասաց Ասոյանը` պարզաբանելով, որ նորմերը խախտողների համար սահմանվելու են տուգանքներ, ընդհուպ` մինչև գործունեության կասեցում։
«Այսինքն` այնտեղ նախատեսված է, թե քանի քառակուսի մետրի համար քանի լվացարան, զուգարանակոնք պիտի տեղադրված լինի»,– ասաց Ասոյանը։
Հայաստան ժամանող չինացի զբոսաշրջիկների թիվն աճել է, բայց վիզան խանգարում է
ՀՀ տարածքային կառավարման և ենթակառուցվածքների նախարար Սուրեն Պապիկյանն էլ հայտնեց, որ 2019թ–ի ընթացքում զուգարանների առկայության վերաբերյալ ստուգումներ են անցկացվել ավտոճանապարհների վրա գործող գազալցակայաններում։ Ըստ նախարարի` դրանք արդեն 80 տոկոսով ապահովված են սանհանգույցներով։
«Բայց այստեղ մեկ այլ խնդիր կա` մշտական սպասարկման հարցը, որը տեսչական մարմնի տիրույթում է»,– ասաց Պապիկյանը` հավելելով, որ զուգարանի հիգիենիկ վիճակը պետք է վերահսկի տեսչությունը։ Ընդ որում, տեսչական մարմինն ունի տուգանելու իրավունք, բայց չունի ոչ պատշաճ սպասարկող գազալցակայանների գործունեությունն արգելելու իրավունք։
Զբոսաշրջությունը շարունակում է զարգանալ. Փաշինյանը դիմել է տաքսիստներին ու անցորդներին
Փաշինյանը շեշտեց, որ այս հարցը շատ կարևոր է երկրի վարկանիշի համար, և այն բարձր պահելու համար պետական մարմինները պետք է տնտեսվարողների հետ սկսեն խոսել ավելի կոշտ լեզվով։
«Եթե չեն ապահովում անհրաժեշտ չափորոշիչները, պետք է փակվեն»,– հայտարարեց Փաշինյանը` պետական մարմինների ղեկավարներին հանձնարարելով ժամանակավոր կասեցնել բոլոր այն տնտեսվարողների գործունեությունը, որոնք չեն համապատասխանում ՀՀ–ում սահմանված նորմերին։
