Տարածաշրջանն, ընդհանուր առմամբ, գտնվում է մեծ ռիսկերի ու սպառնալիքների, տարբեր օղակների, տարբեր աղբյուրների ազդեցությունների ներքո, որոնց մի մասը զարգանում է բավական ինտենսիվ, երբեմն պետությունների ու տարածաշրջանային խաղացողների համար դրանց հետևից գնալն ու արձագանքելը բավական բարդ է: Այս մասին Sputnik Արմենիայի հետ զրույցում ասաց քաղաքագետ Ալեն Ղևոնդյանը։
«Հարավային Կովկասն ուղղակիորեն մեծ Մերձավոր Արևելքի մաս կազմող տարածաշրջան է, մենք ադրբեջանցիների հետ սահմանակից ենք Իրանին, հետևաբար օբյեկտիվորեն ցանկացած զարգացում, որի մեջ կարող է ներգրավվել Իրանը, այս կամ այն կերպ կանդրադառնա Հայաստանի վրա»,- նշեց քաղաքագետը:
Ղևոնդյանի խոսքով՝ մյուս կողմից պետք է հաշվի առնել հատկապես այն, որ Ադրբեջանն Իսրայելի հետ ունի բավական ջերմ ռազմաքաղաքական հարաբերություններ, գտնվում է սերտ ռազմատեխնիկական գործակցության մեջ, ու նաև չճշտված տեղեկատվություն կա, ըստ որի՝ ադրբեջանական մի շարք օբյեկտներ, այդ թվում` անօդաչու թռչող սարքեր, հետախուզական կառույցներ ու տեխնիկական միջոցներ հենց Ադրբեջանից են հայտնվել իրանական սեգմենտում, ուստի այս մասով ներգրավվածություն, իհարկե, կլինի:
«Լարվածությունը շարունակական պրոցես է և իր մետաստազներն է տարածում մերձավորարևելյան տարածաշրջանում, որտեղ կարող են ծնվել անկայունության նոր օջախներ, մասնավորապես, Իրանի հյուսիսում, որն իր հերթին սահմանակցում է արցախյան հակամարտության ռեգիոնին, հետևաբար մենք այս առումով պետք է շատ ուշադիր և զգույշ լինենք՝ պատրաստ դիմակայելու ցանկացած արկածախնդրության»,- ասաց քաղաքագետը:
Միսակյան. «Իրանն ունի ռազմական ուժ և խելամիտ դիվանագիտություն ու չի դիմի աղետալի քայլերի»
Ընդհանուր ռեգիոնալ ակտիվությունը, Ղևոնդյանի կարծիքով, կարող է շատ ավելի մեծ ու լարված սցենարների պատճառ դառնալ, հետևաբար մեր գործընկերների հետ պետք է հստակեցնենք հարաբերությունները՝ դրանք դարձնելով առավել կանխատեսելի: Սա վերաբերում է նախևառաջ Ռուսաստանին ու ՀԱՊԿ գործընկեր պետություններին, որոնց հետ աշխատանքի արդյունքում պետք է ադեկվատորեն արձագանքել հնարավոր բոլոր զարգացումներին:
Ղևոնդյանի գնահատմամբ՝ տարածաշրջանային զարգացումների վերաբերյալ Հայաստանի դիրքորոշումները հավասարակշռված են ու իրատեսական:
ԱՄՆ–ն պատրաստ է Իրանի հետ բանակցել առանց նախապայմանների
Ըստ այդմ՝ Հայաստանը չեզոք պահվածքի շնորհիվ չպետք է հայտնվի հակադրությունների միջակայքում և խույս տա այս կամ այն ճամբարում հայտնվելու հեռանկարից:
ԱՄՆ-ի և Իրանի միջև հարաբերությունները սրվել են այն բանից հետո, երբ Բաղդադի մոտ սպանվել է իրանական «Ալ Քուդս» հատուկ ստորաբաժանման հրամանատար Ղասեմ Սոլեյմանին։ Պենտագոնը հաստատել է իր առնչությունն իրանցի գեներալի սպանության հետ։ Հունվարի 8–ի գիշերը իրանական կողմը հրթիռակոծել է Իրաքի տարածքում գտնվող ամերիկյան ռազմաբազաները։
