ԵՐԵՎԱՆ, 6 հունվարի — Sputnik. ՀՀ վարչապետ Նիկոլ Փաշինյանի ընտանիքն ամանորյա արձակուրդների նախավերջին օրն անցկացնում է Գաբրիել Սունդուկյանի անվան ազգային ակադեմիական թատրոնում։ Փաշինյանն իր տիկնոջ՝ Աննա Հակոբյանի և դուստրերից երկուսի՝ 12-ամյա Շուշանի և 4-ամյա Արփիի հետ դիտում են «Ալադին» ներկայացումը։
Ուր տանել երեխաներին. թատրոններն Ամանորի ուրախ ներկայացումներ են բեմադրել
Բայց Փաշինյանը, սովորության համաձայն, որոշեց նկարահանել այն, ինչ կատարվում է բեմում, և ուղիղ եթեր սկսեց։ Սակայն սյուժեին հիացմունքով հետևող փոքրիկ Արփին «նկատողություն արեց» հայրիկին։
«Պապ, չեմ տեսնում ոչ մի բան, որ էդպես ես անում»,- նեղսրտեց Արփին։
Վարչապետը ժպտաց և հետաքրքրվեց, թե հատկապես ինչն է խանգարում դստերը։ Երբ Արփին բացատրեց, որ հայրը հեռախոսով փակում է իր տեսադաշտը, Փաշինյանը միանգամից անջատեց ուղիղ եթերը։
Հիշեցնենք, որ Փաշինյանն ունի չորս երեխա։ Ավագ դուստրը՝ Մարիամ Փաշինյանը, աշխատում է տեղեկատվական տեխնոլոգիաների հայաստանյան ընկերություններից մեկում, որդին՝ Աշոտ Փաշինյանը, պարտադիր զինվորական ծառայություն է անցնում Ստեփանակերտում, Շուշանը դպրոցական է, իսկ Արփին վայելում է կյանքն առանց պարտավորությունների։
