2019-ը Հայաստանի ժուռնալիստների միության համար բազմապրոֆիլ ուղղություններով հարուստ տարի էր, ամենակարևորը տարածքների վերադարձման հարցն է, որովհետև միությունը գտնվում է դատական գործընթացներում և պայքարում է, որ վերադարձնի իր տարածքները: Այս մասին Sputnik Արմենիայի հետ զրույցում ասաց Հայաստանի ժուռնալիստների միության նախագահ Սաթիկ Սեյրանյանը։
«Հուսով եմ, որ կհաջողենք ու կվերադարձնենք մեր միության տարածքները, որոնք կնքվել են նախկին ղեկավարության օրոք` միության համար նվաստացուցիչ, ստրկական պայմաններով: Գալիք տարում կամ տարիներին եթե նույնիսկ միայն դա անենք, կհամարեմ, որ անձամբ հաջողել եմ»,-նշեց նա:
Ժուռնալիստների միության նախագահը նշեց, որ անցնող տարվա ընթացքում ստացել է սպառնալիքներ պարունակող նամակներ, եղել են զգուշության կոչեր պարունակող զանգեր, սակայն այդ ամենն իրեն չի վախեցնում, որովհետև պատրաստ է պայքարին և իրեն ոչ ոք չի կարող հետ պահել սեփական սկզբունքների ու համոզմունքների համար:
Սաթիկ Սեյրանյանը նորմալ է վերաբերվում նաև այն հանգամանքին, որ իշխանամետ լրատվամիջոցները երբեմն անտեսում են միության հայտարարությունները:
«Ընդհանրապես պետք է զերծ մնալ անպատասխանատու հայտարարություններից: Երբ պատասխանատվության ես կանչում, հեգնում կամ վիրավորում ես լրատվամիջոցներին, ապա վստահ եղիր, որ այդ լրատվամիջոցների միջին և ավագ սերնդի ներկայացուցիչները կարող են ձեր հարյուրավոր հոդվածները ձեր առաջ դնել»,-ընդգծեց Սեյրանյանը և կոչ արեց առավել սթափ լինել:
Sputnik–ի վրա ճնշումը խնդիր է ԶԼՄ–ների ազատության տեսանկյունից. ԵԱՀԿ
Ըստ Ժուռնալիստների միության նախագահի` իր ղեկավարած կառույցը մեդիաանվտանգության վերաբերյալ ծրագրեր է իրականացրել, իսկ միջազգային գործընկերների հետ այլ ծրագրեր են իրականացրել Երևանում, Շիրակի մարզում և Արցախում: Այդուհանդերձ, մեծածավալ և բազմաբնույթ նախաձեռնություններ իրականացնելու համար անհրաժեշտ են ֆինանսական միջոցներ, մինչդեռ միության հնարավորությունները սուղ են:
Սեյրանյան. «2020-ը մամուլի համար լուրջ մարտահրավերների տարի է»
Սեյրանյանի փոխանցմամբ՝ միությունը փորձում է իր հայտարարություններով, արձագանքներով դիտարկումներ անել, թե որն է ճիշտ, որը՝ սխալ, ըստ այդմ՝ պաշտպանել լրագրողների ու լրատվամիջոցների շահերը:
