ԵՐԵՎԱՆ, 1 հունվարի — Sputnik, Արմենուհի Մխոյան. Գյումրիում հաստատված ազգությամբ հայ և իտալացի ամուսիններ Մարիամ Զաքարյանն ու Մասսիմիլիանո Ֆլորիանին Ամանորին ոչ միայն հյուրեր են ընդունել, այլև հասցրել են գյումրեցի ընկերներին այցելել: Նորաստեղծ ընտանիքն ու նրանց հյուրերը հիանալի ժամանակ են անցկացրել:
Մարիամը որոշել է այս տարի խոհանոցում «փորձարկումներ» անել և իտալականը հայկականի հետ միախառնել: Մաքսը, ինչպես նրան սիրում է դիմել կինը, «Մայրաքաղաքային» աղցան շատ է սիրում, որն, ի դեպ, Իտալիայում «Ռուսական» են անվանում, ռուսական օղու փոխարեն էլ հայկական «տնականն» է նախընտրում։
Աղջիկն` օրական, բաժինքը՝ տարեկան, կամ ինչ օժիտ են տարել գյումրեցի աղջիկները
Երևանաբնակ Մարիամն ու իտալացի Մասսիմիլիանոն հանդիպել ու ծանոթացել են Գյումրիում և որոշել են իրենց համատեղ կյանքը այստեղ էլ շարունակել:
«Ուզում էի կյանքս փոխել ու տեղափոխվել այլ երկիր, իսկ Հայաստանն այդ երկրների շարքում առաջինն էր»,- Sputnik Արմենիայի հետ զրույցում անկեղծանում է Մասսիմիլիանոն։
Նա մտական բնակության նպատակով երեք տարի առաջ է Հայաստան տեղափոխվել ու անմիջապես աշխատանքի անցել Գյումրիի հյուրատներից մեկում, որտեղ էլ պատահաբար հանդիպել է Մարիամին։ Հանդիպումը ճակատագրական է եղել։ Ամեն հարցում ինքնատիպ ու ստեղծարար զույգի հարսանիքը Երևան-Գյումրի էլեկտրագնացքում էր, որով նրանք Գյումրի եկան ու մնացին. զույգի բոլոր պլանները հենց այս քաղաքի հետ են կապված:
«Գյումրին ֆանտաստիկ քաղաք է: Ես իտալացի եմ ու գնահատում եմ հնագույն ճարտարապետությունը: Հենց դրա համար եմ ընտրել այս քաղաքը: Ի սկզբանե ուզել եմ գալ ու ապրել այստեղ: Առաջին անգամ 9 տարի առաջ էի եկել Գյումրի ու հենց այդ ժամանակ էլ սիրահարվել եմ այս քաղաքին»,- ասաց Մասսիմիլիանոն:
Ի տարբերություն ամուսնու, Մարիամը մինչև Գյումրի տեղափոխվելը դժվարությամբ է ընդունել այստեղ ապրելու որոշումը, թեև հայրիկը արմատներով Գյումրիից է, ասում է` ցուրտ եղանակից միշտ է խուսափել, բայց կարճ ժամանակ անց գյումրեցիների ջերմությունը աղջկան ստիպել է ցրտին հարմարվել։
Վառ երևակայություն ու ճաշակ. գյումրեցի արվեստագետը հին իրերին Ամանորի շունչ է հաղորդում
Երիտասարդ զույգը բնակարան է վարձակալել «Կումայրի» պատմական կենտրոնում՝ Շիրազի փողոցում: Հնություն սիրող ընտանիքին 1800-ականներին կառուցված շենքի արտաքին տեսքն է գրավել: Իրենց տուն-կենտրոնը զույգը «ԿոնջեԼազիա» է անվանել, հորինված բառ, որի ոչ մի կերպ չի թարգմանվում։ Այն կազմել են հայերն, իտալերեն և ռուսերեն հնչյունների համադրումից:
Մարիամն անկեղծանում է` դժվարությամբ են տարածքը աղբից մաքրել։ բացի մաքրությունից այստեղ գրեթե ամեն ինչ նույնն է մնացել, իսկ դիզայնի համար ընտրել են այն, ինչը գտել են նկուղներից կամ նվեր ստացել:
Հյուրատուն, սրճարան կամ զբոսաշրջիկների հանդիպման վայր հիշեցնող տարածքը նաև սեփական բիզնեսի համար է հարմար։ Ինչպես խոհանոցում՝ ավանդական ու ստեղծարար մոտեցումով, այնպես էլ սեփական բիզնեսում Մարիամն ու Մաքսը, լրացնում են միմյանց: Ամուսնու զբոսաշրջային գաղափարներն ու կնոջ ստեղծարար մտքերն այստեղ են կյանքի կոչվում։ Մարիամի դիզայնով ստեղծած վերնաշապիկները, մագնիսները, քաթանե պայուսակները զույգն այստեղ է վաճառում:
Գյումրու հայտնի Սլաբոտկա թաղամասում տուն են գնել, խոստանում են` վերանորոգումից հետո հյուրերին արդեն նաև այնտեղ ընդունել: Մարիամն ու Մաքսը երազում են Գյումրիում նոր հյուրատուն ունենալ. երիտասարդ ամուսինները որոշել են ապացուցել, որ ոչ միայն քաղաքի կենտրոնում, այլ նաև ծայրամասերում ու հին թաղամասերում Գյումրին զբոսաշրջության զարգացման մեծ պոտենցյալ ունի:
