ԵՐԵՎԱՆ, 30 դեկտեմբերի – Sputnik․ Դոնբասում գերիների փոխանակման մասնակիցներից չորսը, որոնց հաջողվել է Մարիուպոլի մեկուսարանում անցկացրած տարիների ընթացքում հասնել այն բանին, որ Ուկրաինայի իշխանությունը քրեական գործեր հարուցի Ուկրաինայի անվտանգության ծառայության ու «Ազով» գումարտակի ծառայողների իրականացրած խոշտանգումների հիմքով, դոնբասցիներ են։ Այս մասին ձերբակալվածներն ու նրանց փաստաբանը խոսել են ՌԻԱ Նովոստիի նոր հետաքննության շրջանակում։
Կիևը Վյաչեսլավ Բիրյուկովին, Ալեքսանդր Ստելնիկովիչին, Վիկտոր Սկրիպնիկին ու Եվգենի Դրուժինինին կասկածում էր Մարիուպոլում 2014 թվականի մայիսի 9-ին կայացած բախման հետ կապ ունենալու մեջ։
Քառյակին ձերբակալել էին 2014-ի օգոստոսին, սակայն հետաքննության հինգ տարիների ընթացքում ուկրաինական իշխանությանը չհաջողվեց ապացուցել նրանց մեղքը։
Այդ ընթացքում կասկածյալներին կտտանքների են ենթարկել՝ խոստովանական ցուցմունք ստանալու նպատակով։
«Շատ–շատ էին ծեծում։ Մեր ոտքերը դանակով ծակծկում էին, ավտոմատի բռնակով հարվածում մեր դեմքերին։ Խեղդում էին, նույնիսկ` կախում։ Առաստաղից հատուկ կեռիկ կար այդ գործողությունների համար»,-ՌԻԱ Նովոստիի հետ զրույցում իր տանջանքների մասին պատմել է Բիրյուկովը։
Կտտանքների ենթարկված Ալեքսանդր Ստելնիկովիչը եղել է նաև Մարիուպոլի օդանավակայանի տխրահռչակ բանտում, որը գերիներին ցինիկավարի տանջողներն անվանում էին «գրադարան»։
«Հաճախ մեկ-երկու շաբաթով մարդկանց բերում էին` տանջում, խոշտանգում ու ցուցմունք կորզում, որ հետո ամեն ինչ «օրինական» ձևակերպեն։ Այնտեղ շատերին են ծեծել»,-հիշում է Ստելնիկովիչը։
Երիտասարդները հասել են այն բանին, որ քրեական գործ է հարուցվել։ Դոնեցկի մարզի դատախազության քննչական վարչությունը սկսել է քննել այդ գործերը։ ՌԻԱ Նովոստին համապատասխան փաստաթղթեր ունի։
Երեկ կայացավ գերիների փոխանակումը` «բոլորը բոլորի դիմաց» սկզբունքով։ Ուկրաինայի իշխանությունը ինքնահռչակ Դոնեցկի Ժողովրդական Հանրապետությանն ու Լուգանսկի Ժողովրդական Հանրապետությանը ավելի քան 120 մարդ է փոխանցել, Դոնբասը Կիևին` 76։
