ԵՐԵՎԱՆ, 28 դեկտեմբերի — Sputnik. Հինգ տարի առաջ նկարիչ Արմեն Երիցյանը որոշեց, որ ամեն առավոտ իր հետևորդներին պետք է «ջիջիլ» գցի ու Instagram–ի իր էջում ախորժելի, յուրահատուկ ձևավորմամբ իր նախաճաշերի նկարները տեղադրի։ Երիցյանն իր օրինակով է փորձում ցույց տալ, որ սառնարանի պարունակությունը կարևոր չէ համեղ ու գեղեցիկ տեսք ունեցող նախաճաշ պատրաստելու համար։
«Բոլորի սառնարանում կա մինիմալ ուտելիքների այն ցանկը, որից կարելի է հետաքրքիր նախաճաշ պատրաստել։ Պետք է ուղղակի մարդիկ իրենց ֆանտազիան միացնեն, փորձեն սիրուն ձևավորել ու սիրով աշխատել, որ համեղ լինի»,– Sputnik Արմենիայի հետ զրույցում Երիցյանը։
Նա, ի դեպ, նախաճաշերի մեջ հիմնականում կիրառում է այն, ինչն այնքան էլ «դժվարամատչելի» չէ` հավկիթ, բանջարեղեն, մրգեր։ Ուշագրավ է այն հանգամանքը, որ Երիցյանը ոչ միայն նախաճաշերն է գեղեցիկ ձևավորում, այլ նաև դրանք հետաքրքիր սպասքով է մատուցում։ Իսկ գեղեցիկ սպասքը նա և՛ գնել է, և՛ նվեր ստացել։
Ուզու՞մ եք 5 օրում 5 կիլոգրամ նիհարել․ դետոքս ծրագիր` ֆիտնես–մարզիչ Հովհաննես Ավագյանից
Երիցյանի խոսքով` առավոտյան լավ նախաճաշը պարտադիր է, որպեսզի օրը լավ սկսվի։ Նկարիչը պատմում է, որ հաճախ են լինում դեպքեր, երբ երեկոյան Instagram–ի օգտատերերը նամակ են գրում նրան ու հետաքրքրվում` ինչ մթերքներ գնեն, որ պատրաստեն այն, ինչ հենց Երիցյանն է պատրաստելու։
«Ես ինքս էլ չգիտեմ, թե հաջորդ օրն ինչ եմ պատրաստելու, քանի որ սիրում եմ «իմպրովիզներ» անել։ Գրեթե միշտ առավոտյան եմ որոշում` ինչ պատրաստել, չնայած լինում են նաև դեպքեր, որ կանխավ հատուկ ինչ-որ բաներ եմ գնում երեկոյան։ Հետաքրքիր է, որ Instagram–ում իմ տեղադրած նախաճաշերի նկարները սկսեցին «առանձին կյանքով ապրել»»,–պատմեց նա։
Նախաճաշ կամ ընթրիք ամպերի ներքո. Երևանում կբացվի առաջին կախովի ռեստորանը. լուսանկարներ
Երիցյանը լավ օր ունենալու համար խորհուրդ է տալիս անպայման նախաճաշել, իսկ գեղեցիկ նախաճաշ պատրաստելիս` նկարել ու այն ցուցադրել նաև սոցցանցերում։
