ԵՐԵՎԱՆ, 27 դեկտեմբերի — Sputnik. Առանց Սահմանադրական դատարանի ակտի ՍԴ նախագահ Հրայր Թովմասյանին մեղադրանք առաջադրելը հանցագործություն է։ ՍԴ բակում լրագրողների հետ զրույցում ասաց արդարադատության նախկին նախարար Դավիթ Հարությունյանը։
Ինչպես արդեն տեղեկացրել էինք, այսօր ՀՔԾ–ն հարցաքննել էր Թովմասյանին ու ՀՀ քրեական օրենսգրքի 308–րդ հոդվածի 2–րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ) մեղադրանք առաջադրել։
«Հրայր Թովմասյանի պարագայում կա անձեռնմխելիության հարց, և նրան մեղադրանք առաջադրելու համար ՍԴ–ի համապատասխան ակտն էր անհրաժեշտ։ Հակառակ դեպքում` գործ ունենք հանցագործության հետ, որը սահմանված է ՀՀ քրեական օրենսգրքի 309–րդ հոդվածով (պաշտոնեական լիազորություններն անցնելը)»,–ասաց Հարությունյանը։
Իմ ճանաչած որևէ դատավոր չի գնալու վաղաժամ թոշակի. Հրայր Թովմասյան
Ըստ նրա` դատավորների անձեռնմխելիության ինստիտուտը ստեղծվել է, որպեսզի ապահովվի դատարանի անկախությունը։ Հարությունյանը նշեց նաև, որ, ճիշտ է, շատ քիչ, բայց հույս ունի` ՀՀ գլխավոր դատախազը, ում վերահսկողության ներքո էլ գտնվում է Թովմասյանի գործը, չի դառնա 309-րդ հոդվածով կատարված հանցագործության հանցակիցը։
Արդարադատության նախկին նախարարի խոսքով` հաջորդ քայլով պետք է գլխավոր դատախազին բողոք ներկայացվի, որ ՍԴ անդամներին զրկել են իրենց լիազորությունները կատարել։
Հիշեցնենք` 2019թ.–ի հոկտեմբերի 17-ին ՀՔԾ–ն հայտնեց, որ ՀՀ ԱԺ պատգամավոր Արման Բաբաջանյանը ՀՀ գլխավոր դատախազին հաղորդում է ներկայացրել այն մասին, որ մի խումբ պաշտոնատար անձինք յուրացրել են իշխանությունը։
Հաղորդման հիման վրա ՀՀ հատուկ քննչական ծառայությունում նախապատրաստված նյութերով որոշում է կայացվել ՀՀ քրեական օրենսգրքի 300-րդ հոդվածի 1-ին մասով (այն է` իշխանությունը զավթելը` բռնություն գործադրելու կամ բռնություն գործադրելու սպառնալիքի միջոցով, ինչպես նաև Սահմանադրությամբ չնախատեսված այլ եղանակով Հանրապետության Նախագահի, Ազգային ժողովի, կառավարության կամ սահմանադրական դատարանի լիազորություններին տիրանալը) քրեական գործ հարուցելու մասին: Բաբաջանյանի հայտարարությունը վերաբերում է ՍԴ նախագահ Հրայր Թովմասյանին:
«Հրաժարվել եմ որևէ ցուցմունք տալ, իսկ մեղադրանքը որևէ բան չի փոխի իմ կյանքում». Թովմասյան
