ԵՐԵՎԱՆ, 26 դեկտեմբերի — Sputnik. Հայ–ռուսական հարաբերություններում զգուշավորության փուլն ավարտված է։ Այսօր լրագրողների հետ հանդիպմանը, ամփոփելով 2019թ–ին ՀՀ ԱԺ արտաքին հարաբերությունների մշտական հանձնաժողովի աշխատանքները, այս մասին ասաց հանձնաժողովի նախագահ Ռուբեն Ռուբինյանը։
«Բոլորովին վերջերս մեր ռուս գործընկերներն այցելեցին Հայաստան, և այս առումով կարող ենք արձանագրել, որ սկզբնական զգուշավորության փուլը հայ–ռուսական հարաբերություններում հեղափոխությունից հետո լիովին ավարտված է։ Եվ ինչպես մեր համատեղ նիստից հետո գրել էր իմ ռուս գործընկեր Կոնստանտին Կոսաչյովը, կարող ենք արձանագրել, որ թավշյա հեղափոխությունից հետո հայ–ռուսական հարաբերությունները ոչ միայն չեն տուժել, այլ էլ ավելի են զարգացել»,– ասաց Ռուբինյանը։
Հանձնաժողովի նախագահը նշեց, որ հարաբերությունները շարունակվել են նաև եվրոպական ուղղությամբ` կարևորելով Եվրոպական խորհրդարանում ՀՀ դիրքորոշումների ներկայացման անհրաժեշտությունը։
ORSIS–ում առաջընթաց են տեսնում Հայաստան զենք առաքելու ձախողված տենդերի հարցում
Ռուբինյանը նաև հայտնեց, որ տարվա վերջին 6 ամսվա ընթացքում հանձնաժողովը դրական եզրակացություն է տվել 9 միջազգային պայմանագրերի վավերացմանը, այդ թվում` ՀՀ–ի և Չինաստանի միջև վիզային ռեժիմի վերացման և Դանիայի հետ վիզային ռեժիմի դյուրացման մասին պայմանագրերին։
Հանձնաժողովը դրական եզրակացություն է տվել նաև Հայաստան–Սինգապուր բարեկամական խումբ ստեղծելու նախաձեռնությանը։
