ԵՐԵՎԱՆ, 26 դեկտեմբերի — Sputnik. ՀՀ ԱԺ պաշտպանության ու անվտանգության հարցերի մշտական հանձնաժողովի նախագահ Անդրանիկ Քոչարյանը դեկտեմբերի 25-ին հանդիպել է բանակում սպանված ազգությամբ եզդի զինծառայող Արթուր Աջամյանի հարազատներին։
Այս մասին Քոչարյանը հայտարարեց այսօր ԱԺ–ում լրագրողների հետ հանդիպմանը` արձագանքելով զինվորի մոր մեղադրանքներին, թե Քոչարյանը դադարել է պատասխանել իրենց զանգերին, թեև խոստացել էր աջակցել` արդարության ու արդարադատության հասնելու հարցում։
«Իրենք կասկածում էին, որ կոմայի մեջ գտնվող մյուս զինվորականը կոմայից դուրս է եկել և իրենցից դա թաքուն են պահում։ Ասեմ, որ 18 տարեկան մյուս զինվորականը շարունակում է մնալ կոմայի մեջ և ենթարկվել է մի քանի ծանր վիրահատությունների։ Հիմա ովքեր են հարազատներին բերել կառավարության դիմաց, ես չեմ հասկանում»,– ասաց նա` հարցը բարձրացրած լրագրողներին մեղադրելով` երևի ձեր հարցերի հետևից են գալիս։
Քոչարյանը վստահեցրեց, որ կապը զինծառայողի հարազատների հետ մշտապես, ամենօրյա ռեժիմով պահում է թե՛ փաստաբանի, թե՛ քննչական կոմիտեի աշխատակազմի հետ։
ԱԺ–ի մոտ կազմակերպված բողոքի ակցիան ավարտվեց. զինվորի հարազատները հավատացին Քոչարյանին
«Այն խոստումները, որ ես տվել եմ ծնողներին` քննությունն ամբողջությամբ, օբյեկտիվ իրականացնելու և իրենց կողքը լինելու, շարունակական է»,– վստահեցրեց Քոչարյանը։
Հիշեցնենք` այսօր առավոտից զինվորի հարազատները հավաքվել էին կառավարության դիմաց` պահանջելով հանդիպում ՀՀ վարչապետ Նիկոլ Փաշինյանի հետ։
Կառավարության շենքի անվտանգությունն ապահովող ոստիկանների ու նրանց միջև բախումներ սկսվեցին, երբ զինվորի մայրը որոշեց մուտք գործել շենք, իսկ ոստիկանները փակեցին կնոջ ճանապարհը։
Վարչապետին չհանդիպելու դեպքում, նրանք սպառնում են չհեռանալ ու փակել հանրապետության ճանապարհները։
Հիշեցնենք` դեկտեմբերի 2-ին՝ ժամը 06:50-ի սահմանում, ՊԲ հյուսիս-արևելյան ուղղությամբ տեղակայված զորամասերից մեկի պահպանության տեղամասում մահացու հրազենային վիրավորում է ստացել ՊԲ զինծառայող, 1998թ. ծնված Արթուր Իշխանի Աջամյանը։ Զինծառայող, 1999թ. ծնված Դավիթ Հարությունի Մելիքբեկյանը վիրավորվել է։
Եթե կոնֆլիկտ ունենային, նույն դիրքում չէին հերթապահի. Բալայանը` սահմռկեցուցիչ դեպքի մասին
Աջամյանի ծնողները փաստում են` իրենց որդու սպանությունից 24 օր անց, սպանությունը բացահայտված չէ։
Դեկտեմբերի 2–ի դեպքի առթիվ ՀՀ քննչական կոմիտեում 104-րդ հոդվածի 2-րդ մասի 1-ին կետով (սպանություն) քրեական գործ է հարուցվել։
