ԵՐԵՎԱՆ, 24 դեկտեմբերի — Sputnik. Ապրիլյան ԱԺ քննիչ հանձնաժողովի նախագահ Անդրանիկ Քոչարյանը լավ կաներ, որ վարչապետ Նիկոլ Փաշինյանին հրավիրեր հարցաքննության։ Անդրադառնալով Ապրիլյան քննիչ հանձնաժողովի մասին հարցին` այսօր կայացած ասուլիսին ասաց ՀՀԿ Խոսնակ Էդուարդ Շարմազանովը։
«Սերժ Սարգսյանը ապրիլյան քննիչ հանձնաժողովից որևէ թաքցնելու բան չունի: Սերժ Սարգսյանի օրոք Հայաստանի Հանրապետությունը և Արցախը` հայ ժողովուրդը, հաղթել է պատերազմը»,–ասաց Շարմազանովը`պատասխանելով հարցին, թե արդյոք Սերժ Սարգսյանը կընդունի Ապրիլյան պատերազմի հանգամանքներն ուսումնասիրող ԱԺ քննիչ հանձնաժողովի հրավերը:
Նա հիշեցրեց ՀՀ ՊՆ Դավիթ Տոնոյանի խոսքերը, որ հանձնաժողովը կփարատի ժողովրդի բոլոր մտահոգությունները
«Անդրանիկ Քոչարյանը լավ կաներ լսեր ընդդիմության` իմ և իմ գործընկերների կոչերը և հրավիրեր Նիկոլ Փաշինյանին ու հարցներ, թե որտեղից իրեն տեղեկություն, երբ նա ընդդիմադիր պատգամավոր եղած ժամանակ ասում էր, թե Ապրիլյան պատերազմը նախօրոք պայմանավորված պատերազմ էր Ռուսաստանի և Ադրբեջանի կողմից, որպեսզի Ադրբեջանը մտնի ԵԱՏՄ»,–ասաց Շարմազանովը։
Հիշեցնենք` Ապրիլյան քառօրյա պատերազմի հանգամանքների ուսումնասիրության քննիչ հանձնաժողովը ստեղծվել էր ԱԺ–ի` 2019թ.–ի մայիսի 31-ին ընդունած որոշմամբ` 6 ամիս ժամկետով։ Դեկտեմբերի 6-ին Անդրանիկ Քոչարյանի առաջարկով ԱԺ–ը որոշեց հանձնաժողովի գործունեության ժամկետը երկարաձգել ևս 6 ամսով։
2019 թվականին Հայաստանում միայն մեկ բան է թռիչքային աճել. Էդուարդ Շարմազանով
Այդ լրացուցիչ ժամանակահատվածում հանձնաժողովն, ըստ Քոչարյանի, պատրաստվում է լսել պաշտոնյաների պարզաբանումները։ Նրանց թիվը, հանձնաժողովի նախագահի խոսքով, կարող է հասնել 40-ի։
Նախորդ 6 ամսվա ընթացքում հանձնաժողովը 21 նիստ էր գումարել, որոնցում հարցաքննել էր 10 զինծառայողների։
Ապրիլյան պատերազմի հարցերով հանձնաժողովը լսել է գեներալ Մադոյանին
Բացի այդ ՊՆ–ից հանձնաժողով են ուղարկվել մեծ ծավալի փաստաթղթեր, որոնցից առայժմ ուսումնասիրվել է 2684 էջը` 147 տեքստային և 14 գրաֆիկական քարտեզներով, տեղեկատվական– վերլուծական և հետախուզական, զորքերի կառավարման, օպերատիվ և այլ բնույթի գաղտնի և հույժ գաղտնի փաստաթղթերով։
