ԵՐԵՎԱՆ, 23 դեկտեմբերի — Sputnik. Սևանի ջրի մակարդակն այս տարի, նախորդ տարվա համեմատ, զգալիորեն բարձրացել է։ Այս մասին իր տարեվերջյան ամփոփիչ ասուլիսում ասաց տարածքային կառավարման և ենթակառուցվածքների նախարար Սուրեն Պապիկյանը։
«2018–ի համեմատ 2019–ին Սևանի ջրի մակարդակը բարձրացել է 6 սմ–ով։ Սա բավականին մեծ քանակ է, քանի որ 1 սմ–ը ենթադրում է 13 մլն խմ ջրի ավելացում։ Այսինքն` Սևանում այս տարի այդքան ջուր է խնայվել»,–ասաց նախարարը։
Անդրադառնալով ջրային ոլորտում ջրօգտագործողներից հավաքագրված գումարներին` Պապիկյանը նշեց, որ մինչև նոյեմբերի 1–ը 840 մլն դրամի հավաքագրում է եղել։ Նախարարի խոսքով` հույս ունեն, որ մինչև տարեվերջ կկարողանան հավաքագրված գումարների չափը հասցնել 1 մլրդի։
Ձկները փախել են, փողերը` յուրացվել. Սևանի իշխանի ծրագրով քրգործ է հարուցվել
Հիշեցնենք, որ այս տարի ամռանը Սևանը կրկին կանաչել էր։ Բնապահպաններն ահազանգում էին` այս պահին ամենակարևոր երկու խնդիրը Սևանա լճում ջրի ծավալն ավելացնելն է (լճի մակարդակի բարձրացումը՝ ներկայիս 1900,4 մետր նիշից, ցանկալի մակարդակը 1903,5 մ նիշն է, բայց այս պահին 0,5-ից 1 մետր բարձրացումն էլ էական կլիներ) և ձկնապաշարների պահպանումն ու ավելացումը: Գաղափարն այն է, որ լճի մակարդակի բարձրացումը Սևանին ինքնամաքրվելու շանս կտա, իսկ ձկներն էլ բնական ճանապարհով կմաքրեն իրենց բնակավայրը:
