ԵՐԵՎԱՆ, 21 դեկտեմբերի - Sputnik, Աստղիկ Սուքիասյան. GOLD (ոսկի), թե՞ GOD (Աստված)․ ո՞րն է կարևոր։ Կառուցե՞լ սեփական կյանքը նյութական արժեքների՝ փողի ու պաշտոնի վրա, թե՞ մնալ հավատարիմ հոգևոր արժեքներին ու ստեղծել իրական ու մնայուն երջանկություն։ Ահա գլխավոր հարցը, որի շուրջ իր ներկայացումը կառուցել է մասնագիտությամբ քաղաքագետ, բայց հոգով ու սրտով դերասան Հայկ Պետրոսյանն իր «In God We Trust» ներկայացմամբ։ Sputnik Արմենիան ներկա է եղել ներկայացման պրեմիերային և զրուցել դերասանի հետ։
Ներկայացումը մերկացնում է հոգևորի և նյութականի բախումը, որն առկա է և՛ կին- տղամարդ հարաբերություններում, և՛ քաղաքականության մեջ, և՛ գրեթե ամենուր:
«Չբռնե՞մ, մտնեմ քաղաքականություն». Հայկն այս հարցադրումով է սկսում և ավարտում ներկայացումը։ Չնայած մասնագիտությամբ քաղաքագետ է, բայց չի կարծում, որ երբևէ կմտնի քաղաքականություն:
«Ես այդ աշխարհը չեմ սիրում, դա իմ տեղը չէ: Իմ սիրած աշխարհում մարդկային փոխհարաբերություններն ուրիշ արժեքների վրա են հիմնված»,- Sputnik Արմենիայի հետ զրույցում ասաց դերասանը:
Իր ներկայացումների թեմաները Հայկն ինքն է ընտրում, սցենարը ևս գրում է միայնակ։ Այնուհետև, սովորույթի համաձայն, կարդում է իր մտերիմների մոտ, լսում նրանց կարծիքներն ու շտկումներ անում, երբեմն էլ` կրճատում։
Անգելինա Վովկն ամուսնանում է. տարիքային տարբերությունը չի խանգարի
Խոստովանում է` հանդիսատեսն իրեն շատ է օգնում և ամեն անգամ հենց նրա շնորհիվ է ներկայացումը հաջողում։
«Ներկայացումը առաջին հերթին հանդիսատեսի համար է: Պետք է միշտ չանցնես չափը, ինչպես կին-տղամարդ հարաբերություններին առնչվող, այնպես էլ քաղաքական թեմաներին վերաբերող հումորներում։ Մարդիկ պետք է դրական լիցքերով հեռանան ներկայացումից»,- ասաց նա:
Դիտարկմանը, որ շատերը բեմում իրեն հորը՝ դերասան Վարդան Պետրոսյանին են նմանեցնում, Հայկը ժպիտով է պատասխանում՝ բա հորս տղան եմ, ո՞ւմ նմանեցնեն։
«Ես մեծացել եմ հորս ներկայացումները նայելով և ոչ թե մտածված եմ փորձում նրան նմանվել, այլ այդպես ստացվում է: Այս պարագայում հարկավոր է մի փոքր զգույշ լինել, որ ես մնամ Հայկը, բայց հայրս ներկայացումներ գրելու այնքան լավ ձև է գտել, որ երիտասարդ սերնդից ցանկացած մարդ, որն ուզում է լավ սցենար գրել, սկսում է հորս նմանվել»,- հպարտանում է դերասանը։
Ինչ խոսք, անհնար է չնմանացնել հայր և որդի Պետրոսյանների քաղաքական սարկազմն ու հումորը։
«Եթե մի պահ մոռանանք, որ մենք հայր և որդի ենք, ինձ համար Վարդան Պետրոսյանն այն մեծ արտիստներից է, որին նմանվելը շատ շոյող փաստ է»,- ասաց դերասանը։
Դերասան Վարդան Պետրոսյանը` Հայկի ամենամեծ խորհրդատուն ու քննադատը, ներկայացումը դեռ չի դիտել, քանի որ Փարիզում է:
Իսկ բոլոր նրանք, ովքեր ինչ-ինչ պատճառներով ներկայացմանը ներկա չեն եղել, այն վայելելու հնարավորություն կունենան արդեն 2020-ին։ Նոր տարում In Gold We Trust-ը կցուցադրվի նորովի` նոր երգեր կավելացվեն, հումորային հատվածները կփոփոխվեն, իսկ եթե երկրի հասարակական- քաղաքական կյանքում այնպիսի իրադարձություն կատարվի, որը մեկնաբանության կարիք ունենա, ներկայացման մեջ Հայկն անպայման դրան էլ կանդրադառնա։
Հրամանով գրված գլուխգործոց. հանրությունը սպասում է «Սուսերով պարը» ֆիլմին
Գալիք տարվա առաջին ներկայացումը նախատեսված է հունվարի 13-ին Ստանիսլավսկու անվան դրամատիկական թատրոնում:
