ԵՐԵՎԱՆ, 20 դեկտեմբերի — Sputnik. Քրեակատարողական հիմնարկներում գործել են գումարների կայուն դրույքաչափեր` այսպես կոչված` ставка- ներ` դատապարտյալներին մատուցվող որոշակի ծառայությունների դիմաց։ Այսօր լրագրողների հետ հանդիպմանը պատմել է ՔԿԾ պետ, արդարադատության գեներալ-մայոր Արթուր Գոյունյանը։
«Օրինակ` հասարակության մեջ լուրեր են տարածված եղել, որ սահմանված ժամկետից ավելի երկար տեսակցության յուրաքանչյուր ժամվա համար դրույքաչափը կազմել է 100 դոլար, երկարատև տեսակցության դրույքաչափը` 300 դոլար, հանձնուքի համար` 100 դոլար։ Սահմանված դրույքաչափեր են եղել նույնիսկ մարմնավաճառների ծառայությունների համար. 300 դոլար սովորական խավի համար, իսկ ունևոր խավի համար` մինչև 1000 դոլարի սահմաններում։ Գումարներ են գանձվել նաև տույժ չսահմանելու կամ տույժը սահմանված ժամկետից շուտ հանելու համար և այլն»,– ասաց Գոյունյանը։
ՔԿԾ պետն անդրադարձավ նաև «զոն նայողների» ինստիտուտի խնդրին։ Նրա բնորոշմամբ` այդ մարդիկ ազատազրկման վայրերում տարիներ շարունակ եղել են «դրության տերը», «եղանակ ստեղծողները», «վարչակազմի հետ հարաբերություն ստեղծողներն» ու «կոռուպցիոն սխեմաներ ապահովողները»։
Կեսգիշերին թմրանյութերի փաթեթ են նետել «Սևան» ՔԿՀ–ի տարածք
«Այդ կատեգորիայի անձանց համար բացահայտ ապահովված են եղել կենցաղի, սննդի, ազատ տեղաշարժի, հարմարավետության ու հանգստի լավագույն պայմանները` սկսած լավագույն սնունդ մատակարարելուց և վերջացրած նրանց պահման խցերը խոհանոցային և այլ կահույքով ու անհրաժեշտ պարագաներով կահավորելուց։ Վերջիններիս խցերի դռները երբեք չեն փակվել, նրանց հետ կապված որևէ խուզարկություն չի արվել, այդ անձանց նկատմամբ տույժեր չեն նշանակվել և այլն»,– ասաց Գոյունյանը։
Նա շեշտեց, որ իր նշանակման առաջին իսկ պահից հայտարարել է, որ այդ ամենն արդեն անցյալում է, և որ ՔԿՀ–ներում չպիտի լինեն արտոնյալներ, ՔԿՀ ծառայողներն էլ չպիտի ունենան կաշկանդվածություն ու կախվածություն դատապարտյալներից։
Գոյունյանը պատմեց նաև, որ, երբ նշանակումից հետո այցելել է «Արմավիր» ՔԿՀ, պարզել է, որ երկարատև տեսակցությունների 10 սենյակներից միայն 2-ն են կահավորված ու նորոգված եղել։ Պարզվել է նաև, որ դրանք կահավորվել են «զոն նայողների» միջամտությամբ։
Բացահայտումից հետո վերանորոգվել ու կահավորվել են նաև մնացած 8-ը։
Գողականները փոխում են իրենց «օրենքները». «Հրապարակ»
Գոյունյանը հայտնեց, որ կառավարության հատկացրած միջոցների հաշվին վերանորոգվել են նաև «Աբովյան» և «Դատապարտյալների հիվանդանոց» ՔԿՀ–ները։
Հաջորդ տարի բոլոր ՔԿՀ–ները կհամալրվեն նաև նոր, ժամանակակից սկանավորման սարքավորումներով, ինչի շնորհիվ հանձնուքները բացելու կամ ծակծկելու կարիք այլևս չի լինի։ Սննդի բարելավման ծրագիրն էլ , ՔԿԾ պետի կանխատեսմամբ, մեծապես կնվազեցնի հանձնուքներում տնից բերվող սննդի քանակը։
