ԵՐԵՎԱՆ, 17 դեկտեմբերի — Sputnik. ԱՄՆ վարչակազմի դիրքորոշումը Հայոց ցեղասպանությունը ճանաչելու վերաբերյալ չի փոխվել` չնայած Սենատի ընդունած բանաձևին, նշված է Պետդեպարտամենտի հայտարարությունում։
Հիշեցնենք` դեկտեմբերի 12–ին ԱՄՆ Սենատը միաձայն ընդունեց Հայոց ցեղասպանության ճանաչման բանաձևը։ Այն 4-րդ անգամ ներկայացրել էին սենատորներ Ռոբերտ Մենենդեսն ու Թեդ Քրուզը։
Բանաձևը (S.Res.150) սահմանում է Հայոց ցեղասպանության ժխտողական քաղաքականությունից հրաժարում, ԱՄՆ–ի կառավարության անունից Հայոց ցեղասպանության ճանաչում և իրազեկում` ապագայում նման հանցագործությունները կանխելու նպատակով։
«Վարչակազմի դիրքորոշումը չի փոխվել։ Մեր հայացքներն արտացոլված են այս տարվա ապրիլին նախագահի արած հայտարարության մեջ», – նշվում է Պետդեպարտամենտի կայքում հրապարակված հաղորդագրությունում։
ԱՄՆ նախագահ Դոնալդ Թրամփն այս տարվա ապրիլի 24–ին` Հայոց ցեղասպանության զոհերի հիշատակի օրը, այդ իրադարձությունը որակեց «20–րդ դարի վատագույն զանգվածային գազանություններից մեկը»` խուսափելով «ցեղասպանություն» եզրույթից։
