ԵՐԵՎԱՆ, 14 դեկտեմբերի — Sputnik. ԱՄՆ նախկին փոխնախագահ, ԱՄՆ նախագահի դեմոկրատ թեկնածու Ջո Բայդենը ողջունել է Հայոց ցեղասպանությունը ճանաչող ու դատապարտող բանաձևն ընդունելու` ԱՄՆ Սենատի որոշումը։ Նա այդ մասին գրառում է արել Twitter-ում։
I applaud the Senate's landmark legislation formally recognizing the Armenian Genocide. If we don't fully acknowledge the past, “never again” loses its meaning. The facts must be as clear and as powerful for future generations as for those whose memories are seared by tragedy. https://t.co/vfy3B0bbB7
— Joe Biden (@JoeBiden) December 13, 2019
«Ես ողջունում եմ Սենատի կողմից կարևորագույն այս որոշման ընդունումը, որով ճանաչվում է Հայոց ցեղասպանությունը: Եթե մենք լիարժեքորեն չառերեսվենք անցյալին, ապա «այլևս երբեք» բանաձևը կկորցնի իր ողջ իմաստը,-Twitter-ում գրել է Բայդենը` հավելելով,-փաստերը պետք է շատ հստակ ու ազդեցիկ լինեն թե՛ ապագա սերունդների, և թե՛ այդ ողբերգության ականատեսների համար»:
Սեպտեմբերի 16-ին Բայդենը նամակ էր ուղղել Ամերիկայի Հայ դատի գրասենյակ` գրելով, որ ԱՄՆ-ն պետ է մեկընդմիշտ հաստատի իր դիրքորոշումը Հայոց ցեղասպանության հարցում։
Նշենք, որ Բայդենը համարվում է Դեմոկրատական կուսակցության ամենահեռանկարային թեկնածուներից։ Դեկտեմբերի 10-ի դրությամբ RealClearPolitics-ի տվյալներով՝ նրա համար պատրաստ են ձայն տալ գրանցված դեմոկրատ ընտրողների 28,5%-ը։
Հիշեցնենք` դեկտեմբերի 12–ին ԱՄՆ Սենատը միաձայն ընդունեց Հայոց ցեղասպանության ճանաչման բանաձևը։ Այն 4-րդ անգամ ներկայացրել էին սենատորներ Ռոբերտ Մենենդեսն ու Թեդ Քրուզը։
Հայոց ցեղասպանության մասին բանաձևը (S.Res.150) սահմանում է Հայոց ցեղասպանության ժխտողական քաղաքականությունից հրաժարում, ԱՄՆ–ի կառավարության անունից Հայոց ցեղասպանության ճանաչում և իրազեկում` ապագայում նման հանցագործությունները կանխելու նպատակով։
Սենատորն արտասվել է Ցեղասպանության բանաձևի համար շնորհակալություն հայտնելիս. տեսանյութ
Հիշեցնենք, որ Օսմանյան Թուրքիայում տեղի ունեցած Հայոց ցեղասպանությունը 20-րդ դարի առաջին ցեղասպանությունն է։ Չնայած այդ փաստը ճանաչել են բազմաթիվ երկրներ, սակայն Թուրքիան՝ Օսմանյան կայսրության իրավահաջորդը, ավանդաբար հերքում է այդ իրողությունն ու դրան առնչվող մեղադրանքները։
