ԵՐԵՎԱՆ, 13 դեկտեմբերի — Sputnik. «Հրապարակ» թերթը գրում է, որ Կառավարության երեկվա նիստի չզեկուցվող հարցերի թվում՝ 61-րդ հարցով, իշխանությունը հերթական ծածուկ որոշումն է կայացրել։ Զեկուցողը եղել է ֆինանսների նախարարությունը։
«Որոշվել է ՀՀ կառավարության պահուստային ֆոնդի հաշվին «Արտասահմանյան պաշտոնական գործուղումներին» 2019 թվին հատկացված գումարն ավելացնել 95 մլն դրամով։ Բացատրությունն այն է, որ հատկացված գումարները չեն բավարարել։ Իսկ 2019-ին պետական բյուջեով նախատեսված է եղել 350 մլն դրամ, ընդ որում՝ կառավարության նախկինում կայացված 3 որոշումներով նշված գումարն ավելացվել է 530 մլն դրամով՝ կազմել 880 մլն»:
Թերթը նաև գրում է,որ մինչ այս պահը 880 միլիոն դրամից ծախսվել է 844.2 մլն-ն, սակայն մնացած 36 միլիոնը, պարզվում է, բավարար չէ մինչև տարեվերջ գործուղումների գնալու համար, ուստի ևս 95 միլիոն են ավելացրել: Այսինքն՝ պետական բյուջեից մոտ 2 միլիոն դոլար ծախսվել է վոյաժների վրա, ինչը փորձում են հանրությունից գաղտնի պահել:
ՀՀ նախագահն ավելի շատ է գործուղման գնում, քան նախատեսված էր բյուջեով
Հիշեցնենք, որ հոկտեմբերի 17–ին ՀՀ կառավարության անդամների արտասահմանյան գործուղումների համար 2019թ–ի բյուջեի պահուստային ֆոնդից հատկացվեց լրացուցիչ 290 մլն դրամ։
Կառավարության կայքում հրապարակված որոշման նախագծից պարզ էր դառնում, որ 290 մլն–ից 190-ը տրամադրվել է «արտասահմանյան պատվիրակությունների ընդունելությունների և պաշտոնական գործուղումների կազմակերպում» բյուջետային հոդվածով, 100 մլն–ը` «արտասահմանյան պաշտոնական գործուղումներ» հոդվածով։
Գործուղումների վրա ծախսվող գումարներն ավելացնելու որոշում էր ընդունել նաև 2019թ–ի սեպտեմբերի 17-ին` այդ նպատակի համար պահուստային ֆոնդից հատկացնելով 310 մլն դրամ:
