Հայոց ցեղասպանությունը դատապարտող բանաձևի հեղինակները պնդում էին, որ յուրաքանչյուր շաբաթ բանաձևը բերելու էին Սենատի օրակարգ և խնդրելու էին, որպեսզի սենատորները քվեարկեն բանաձևի օգտին: Սա նշանակում է, որ շարունակական ու հետևողական աշխատանք էր տարվելու, իսկ Սպիտակ տան ու թուրքական լոբբիստների ռեսուրսները ուղղակի չէին բավականացնի, որպեսզի ամեն շաբաթ գային ու վետո կիրառեին: Այս մասին Sputnik Արմենիայի հետ զրույցում ասաց քաղաքագետ Սուրեն Սարգսյանը։
«Հիմա ԱՄՆ-ում Թուրքիայի շահերը պաշտպանելը պոպուլյար չէ: Այդ պատճառով էլ թուրքերի համար ստեղծվել էր բավականին բարդ իրավիճակ, ինչից շատ ճիշտ օգտվեցին մեր լոբբիստական կազմակերպություններն ու հայկական համայնքը՝ առաջ մղելով երկու բանաձևերը թե՛ Ներկայացուցիչների պալատում, թե՛ Սենատում»,- նշեց Սարգսյանը:
Քաղաքագետի դիտարկմամբ՝ պետք է հավուր պատշաճի գնահատել հայկական համայնքի արդյունավետ աշխատանքը՝ շնորհակալություն հայտնելով Հայկական ասամբլեային և Հայ դատի գրասենյակին: Իհարկե, եղել են նաև համայնքի առանձին, ազդեցիկ ներկայացուցիչներ, որոնք հանրային դաշտում ունեն լուրջ դերակատարություն և աշխատել են սենատորների հետ՝ օգտագործելով ջերմ հարաբերությունները:
Դոնալդ Թրամփը պետք է հետևի Սենատի օրինակին և ճանաչի Ցեղասպանությունը. Սամանթա Փաուեր
Հիշեցնենք` երեկ` դեկտեմբերի 12–ին, ԱՄՆ Սենատը միաձայն ընդունեց Հայոց ցեղասպանության ճանաչման բանաձևը։ Այն 4-րդ անգամ ներկայացրել էին սենատորներ Ռոբերտ Մենենդեսն ու Թեդ Քրուզը։
Կոնգրեսի Ներկայացուցիչների պալատը նախկինում արդեն ընդունել էր Հայոց ցեղասպանության ճանաչման բանաձևը։
Բացվեց մեր պահանջատիրության պատմական նոր էջը. Գարեգին Բ–ն ողջունել է ԱՄՆ Սենատի որոշումը
Նշենք, որ Հայոց ցեղասպանության մասին բանաձևը (S.Res.150) սահմանում է հրաժարվել Հայոց ցեղասպանությունը ժխտելուց, ԱՄՆ–ի կառավարության անունից պաշտոնապես ճանաչել Հայոց ցեղասպանությունը և հարգել Ցեղասպանության զոհերի հիշատակը, իրազեկել Հայոց ցեղասպանության մասին` ապագայում նման հանցագործությունները կանխելու նպատակով։
