ԵՐԵՎԱՆ, 12 դեկտեմբերի — Sputnik. Բանակից խուսափած 27 տարեկաններն այլևս 10 000 դոլարով պատասխանատվությունից չեն ազատվի։ Կառավարության այսօրվա նիստում այս մասին հայտարարեց ՀՀ պաշպանության նախարար Դավիթ Տոնոյանը` ներկայացնելով «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքում փոփոխություններ կատարելու կառավարության առաջարկությունը։
«Օրենքի գործողության ժամանակային ընթացքը ցույց է տվել, որ այն դարձել է պարտադիր զինվորական ծառայությունից խուսափելու միջոց, որի հետևանքով 18 տարին լրացած շատ քաղաքացիներ, հույսը դնելով օրենքով կարգավորվող հարաբերությունների և դրանում սահմանված ժամկետների պարբերաբար երկարաձգումների վրա, նախընտրում են Հայաստանը լքելու միջոցով խուսափել զորակոչից»,– ասաց նախարարը։
Տոնոյանը շեշտեց, որ այս կարգավորումն արդարացի չէ իրենց սահմանադրական պարտքը կատարած ՀՀ քաղաքացիների նկատմամբ։ Միաժամանակ այդ տարիների ընթացքում չի նվազել նաև զորակոչից խուսափողների թիվը, ինչը, ըստ Տոնոյանի կապված է նույն օրենքի հետ։
«Խոսքը 1992թ–ին ծնված քաղաքացիների մասին է, որոնք առաջին անգամ զորակոչից խուսափել են 2010թ–ին։ Պատկերացնո՞ւմ եք` 2010թ–ին ինչ–որ անձնավորություն խուսափել է ծառայությունից, և 9 տարի հետ մենք թույլ ենք տալիս նրան դարձյալ ազատվել»,– ասաց Տոնոյանը` շեշտելով, որ կառավարությունը նպատակահարմար չի գտնում օրենքի ժամկետը երկարաձգել և առաջարկում է սահմանափակել 2019թ–ի դեկտեմբերի 31-ով։
Տոնոյանի տվյալներով` մինչև այդ ժամկետի ավարտը օրենքը կիրառելի է շուրջ 3000 մարդու նկատմամբ, որոնք կարող են մինչև տարեվերջ օգտվել այդ իրավունքի ընձեռած հնարավորությունից։ Նախարարը նշեց նաև, որ մեծ թվով դիմումներ այս պահին նախարարությունն այդ անձանց արդեն ստացել է։
ՀՀ վարչապետ Նիկոլ Փաշինյանը ևս համաձայնեց պաշտպանության նախարարի դիրքորոշմանը։
«Բոլոր այն քաղաքացիները, որոնք նման ցանկություն ունեն, հնարավորություն ունեն ինքնաթիռի տոմս առնել, գալ Հայաստան, այս բոլոր պրոցեդուրաներն անցնել ու Նոր տարին էլ անցկացնել հայրենիքում։ Այնպես որ արձանագրենք, որ այս օրենքի երկարաձգում այլևս չի լինելու։ Եվ այս օրենքը գոյություն ունի մինչև 2019թ–ի դեկտեմբերի 31-ը ներառյալ։ 2020թ–ի հունվարի 1-ի 00։01 րոպեին այլևս գոյություն չունի»,– հայտարարեց Փաշինյանը։
Հիշեցնենք` «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքն ընդունվել է 2003 թվականին։ Դրա գործողության ժամկետը սահմանված էր 2019 թվականի մարտի 1-ը։ Կառավարության առաջարկով այն մեկ անգամ արդեն երկարացվել էր մինչև 2019 թվականի դեկտեմբերի 31-ը։
