ԵՐԵՎԱՆ, 9 դեկտեմբերի — Sputnik. Կոռուպցիայի մեջ ներքաշվելու դեպքում Նիկոլ Փաշինյանը չի ներելու ո՛չ իր թիմի անդամներին, ո՛չ մերձավորներն։
Այս մասին այսօր ՀՀ վարչապետը հայտարարել է «Կոռուպցիայի դեմ պայքարը՝ հանուն կայուն զարգացման նպատակների» թեմայով փորձագիտական քննարկման ժամանակ։
Վարչապետը վստահեցրել է նաև, որ Հայաստանում համակարգային կոռուպցիա չկա։ «Համակարգային կոռուպցիան այն է, երբ կոռուպցիոն օղակներում գոյություն ունեցող յուրաքանչյուր հասույթ, գումար, որոշակի չափաբաժիններով հոսում է դեպի վերև և հասնում է մինչև ամենավերևները: Կարող եմ վերահաստատել` ուրախ եմ և հպարտ արձանագրելու համար, որ Հայաստանում համակարգային կոռուպցիա չկա, բայց դա չի նշանակում, թե Հայաստանում չկան կոռուպցիոն երևույթներ»,– ասաց նա։
Վարչապետը նաև վստահեցրել է, որ Հայաստանում կա կոռուպցիան արմատախիլ անելու քաղաքական կամք։
Գևորգ Լոռեցյանի ձերբակալությունը նրա թիմակիցների համար տհաճ է ու զարմանալի
«Կոռուպցիան սարսափելի դեմքով, պոզով, պոչով կենդանի չէ, երբեմն ունի բավականին գրավիչ, հաճելի, նույնիսկ գայթակղող տեսք և արտաքին: Այս առումով խնդիրն ավելի է բարդանում: Քաղաքական ամենաբարձր մակարդակում արձանագրել ենք, որ ուղղակի կոռուպցիայի մեզ հայտնի և ակնհայտ ձևերի նկատմամբ արգելքներ սահմանելը չի նշանակում երաշխավորված լինել կոռուպցիայի մեջ ներքաշվելուց»,- ասաց Փաշինյանը:
Ինչ վերաբերում է անձամբ իրեն, Փաշինյանը հայտարարել է, որ ինքը իրեն համարում է «կոռուպցիայի հետ գենետիկորեն անհամատեղելի քաղաքական գործիչ»:
Նիկոլ Փաշինյանն իր ելույթում անդրադարձավ նաև պետական համակարգի պարգևատրման ֆոնդերին ու պետական աշխատողների վճարումներին։
«Մեկնաբանություն եղավ, որ դա նաև պայքար է կոռուպցիայի դեմ: Բովանդակային առումով դա սխալ չէ, սակայն ուզում եմ հստակեցնել: Աշխատավարձի չափով վճարումների բարձրացումը ոչ թե կանխարգելելու իմաստով է, այլև դա արվել է, որ հետագայում կոռուպցիոն գործարքների մեջ ներգրավվելու պարագայում խղճի խայթ չունենանք, թե այնքան քիչ աշխատավարձ ենք տվել, որ գնացել են այդ ճանապարհով»,-ասաց նա։
Կառավարությունը փոխում է կենսաթոշակների վճարման կարգը
Այդուհանդերձ, վարչապետը չհերքեց, որ պետական միջոցները ոչ միշտ են արդյունավետ ծախսվում, այդ թվում` նաև վարչապետի գործունեությանն ուղղված գումարները։ Հետևաբար, առաջիկայում կառավարության առաջնահերթ խնդիրը պետք է դառնա պետական միջոցների արդյունավետությունը։
