ԵՐԵՎԱՆ, 8 դեկտեմբերի–Sputnik. Պոլսո հայոց պատրիարքի ընտրությունից առաջ այսօր Ստամբուլում սկսվել է նրանց ընտրությանը մասնակցող պատվիրակների ընտրությունը: Այս մասին հաղորդում է Arevelk.am–ը:
Նշվում է, որ քվերատուփեր են տեղադրված 30 եկեղեցիների մոտ։ Հայերը պետք է ընտրեն 102 պատվիրակի։ Պոլսահայերից բացի ընտրությանը մասնակցում են Կեսարիայի, Դիարբեքիրի, Ալեքսանդրետի, Հաթայի և Մուսա լեռան`Վաքըֆը գյուղի հայերը։
Նախնական տվյալներով՝ այս ընտրությանը մասնակցելու է մոտ 30 հազար հայ, մինչդեռ ընտրելու իրավունք ունի գրեթե 55 հազար հայ:
Հիշեցնենք`դեկտեմբերի 11-ին Ստամբուլի հայ համայնքն ընտրելու է Պոլսո հայոց 85-րդ պատրիարքին: Ընտրությունը երկու թեկնածուի միջև է՝ պատրիարքի տեղապահ Սահակ եպիսկոպոս Մաշալյանի և Կրոնական ժողովի ատենապետ Արամ արքեպիսկոպոս Աթեշյանի:
Հայտնի է` ով է Պոլսո պատրիարքարանի նոր տեղապահը
Ամիսների առաջ Թուրքիայի ներքին գործերի նախարարությունը նոր Պատրիարքի ընտրության համար համապատասխան կանոնադրություն էր ուղարկել, որի համաձայն՝ Պատրիարքի թեկնածու կարող են լինեն միայն Պոլսո պատրիարքական աթոռին ենթակա եպիսկոպոսները:
Փաստորեն, այս սահմանափակումով խոչընդոտվում էր Թուրքիայից դուրս ծառայող մի շարք եպիսկոպոսների առաջադրվելու հնարավորությունը։
Սա բողոքի ալիք էր բարձրացրել պոլսահայ համայնքում, շատերը հայտարարել էին ընտրություններին չմասնակցելու և դրանք բոյկոտելու մասին։ Հոկտեմբերի 3-ին Պատրիարքարանում տեղի ունեցած ընդլայնված կազմով ժողովի ժամանակ պատրիարքական ընտրությունը նախապատրաստող Նախաձեռնող մարմնի, համայնքային հիմնադրամների նախագահների ու հոգևորականների երկար ու բարդ քննարկման արդյունքում որոշում էր կայացվել չբողոքարկել վիճելի դրույթը և ընտրության գնալ պետության ուղարկած կանոնադրությամբ:
Դրանից օրեր անց Պատրիարքի թեկնածու համարվող Գերմանիայի թեմի նախկին առաջնորդ Գարեգին արքեպիսկոպոս Բեքչյանը Պատրիարքարան նամակ էր ուղարկել` տեղեկացնելով ընտրություններում չառաջադրվելու իր որոշման մասին։ Սրբազան Բեքչյանը նշել էր, որ հրապարակված ուղեցույցն իր սահմանափակումներով վտանգ է ներկայացնում Պատրիարքարանի ապագայի համար։ Բացի այդ, խախտված են մոտ 10 սրբազան եպիսկոպոսների իրավունքները, ինչի պատճառով ինքը նպատակահարմար չի համարում իր մասնակցությունը։
Հիշեցնենք` Ստամբուլում 2019թ. մարտի 8-ին 62 տարեկանում մահացավ Պոլսո Հայոց պատրիարք Մեսրոպ արքեպիսկոպոս Մութաֆյանը։ Նա Պոլսո Հայոց պատրիարքի պաշտոնը զբաղեցնում էր 1998-ից։
Պոլսո հայոց պատրիարքի տեղապահի ընտրությունը կրկին հետաձգվում է
Մութաֆյանը դեմենցիա հիվանդության պատճառով 2008-ից գտնվում էր Ստամբուլի Սուրբ Փրկիչ հայկական հիվանդանոցում։ Պատրիարքն անգիտակից վիճակում էր և չէր կարող իրականացնել իր պարտականությունները, ինչից ելնելով էլ 2010 թվականից պատրիարքական փոխանորդ էր նշանակվել Արամ արքեպիսկոպոս Աթեշյանը։
Թեպետ տեղի հայկական համայնքը բազմիցս հանդես էր գալիս նոր պատրիարք ընտրելու պահանջով, սակայն թուրքական իշխանությունները մշտապես մերժում էին նոր ընտրությունների անցկացումը՝ մեջբերելով 1863թ. Ազգային սահմանադրության դրույթն այն մասին, որ նոր պատրիարքի ընտրություն կարող է անցկացվել միայն գործող պատրիարքի մահից հետո։
