ԵՐԵՎԱՆ, 5 դեկտեմբերի, Sputnik. Այսօր` դեկտեմբերի 5–ի լուսադեմին, թալանել են «Ֆլեշ» ընկերությանը պատկանող բենզալցակայաններից մեկը, որը գտնվում է Քանաքեռ-Զեյթուն վարչական շրջանում։ Մի քանի հոգով մտել են լիցքավորողի սենյակ, վերցրել նրա մոտ եղած փողն ու բջջային հեռախոսները։
Երևանում ավազակային հարձակում են կատարել բուքմեյքերական գրասենյակի վրա. լուսանկարներ
Sputnik Արմենիայի տեղեկություններով` լիցքավորողը չի տեսել նրանց դեմքը, քանի որ հարձակվողները դիմակներով են եղել։ Բենզալցակայանի աշխատակիցը ոչինչ չի կարողացել անել․ դիմակավորված անձինք ատրճանակով և դանակով սպառնացել են։
Դեպքից հետո բենզալցակայան են եկել մեծ թվով ոստիկաններ ու քննիչներ։
Նրանք ուսումնասիրել են դեպքի վայրը և պարզում են տեղի ունեցածի մանրամասները։
Ավազակային հարձակում Գյումրիում. դիմակավորված անձինք ծեծել են թոշակառու կնոջը
Բենզալցակայան է ժամանել նաև շտապօգնության խումբ, քանի որ հարձակման ժամանակ վնասվել է բենզալցակայանի աշխատակցի ձեռքը, ամենայն հավանականությամբ՝ դանակով։
Նշենք, որ «Ֆլեշ» ընկերությունը պատկանում է ԱԺ նախկին պատգամավոր Բարսեղ Բեգլարյանին։
