Մամեդյարով-Մնացականյան հանդիպումից ակնկալիքները մեծ չէին՝ հաշվի առնելով մի շարք գործոններ, որոնց թվում են Ադրբեջանի առավելապաշտական քաղաքականության դիրքորոշման պահպանումը, ռազմատենչ հռետորաբանությունը, ինչպես նաև Ադրբեջանում սկսված ներքաղաքական գործընթացը: Այս մասին Sputnik Արմենիայի հետ զրույցում ասաց քաղաքագետ Նարեկ Մինասյանը։
«Այդ ամենը հիմք էր տալիս ենթադրելու, որ Բրատիսլավայի հանդիպումից էական արդյունքներ պետք չէր ակնկալել: Այդուհանդերձ հանդիպման ընթացքում կարևորվել են այնպիսի հարցեր, ինչպիսիք են փոխվստահության մթնոլորտի ապահովումը, հրադադարի ռեժիմի ամրապնդումը, որոնք շատ կարևոր են»,- նշեց նա:
Մինասյանի խոսքով` Արցախի սահմաններին վերջերս տեղի ունեցած միջադեպերը հաստատում են, որ հայկական կողմն արդարացիորեն է պնդում, որ նմանատիպ մեխանիզմների ներդրումը և հրադադարի ռեժիմի ամրապնդման ուղղությամբ քայլերի ձեռնարկումն իրոք անհրաժեշտություն են:
Բաբայան. «Մնացականյան–Մամեդյարով հանդիպումից հեղափոխական առաջընթաց ակնկալելը վաղաժամ էր»
Քաղաքագետի դիտարկմամբ՝ հանդիպման ընթացքում քննարկվել է նաև ադրբեջանցի ու հայ լրագրողների փոխայցելությունների թեման, որովհետև կարևոր էր ամփոփել արդյունքները և տալ այն հարցի պատասխանը, թե արդյո՞ք անհրաժեշտ է շարունակել տվյալ ծրագիրը: Կողմերը դրական են գնահատել այդ նախաձեռնությունը:
Բրատիսլավայում ստորագրվելիք փաստաթուղթ սեղանին չկա. Փաշինյան
«Հայկական կողմը հանդիպման շրջանակում բավական հստակ արձանագրել է, որ բովանդակային քննարկման համար անհրաժեշտ է արցախյան կողմի մասնակցությունը, ինչը նույնպես կարևոր է և իր մեջ որոշակիորեն պարունակում է Մամեդյարովի հայտարարությունների պատասխանը»,- ընդգծեց Մինասյանը:
Քաղաքագետն ակնկալում է, որ որոշ մանրամասներ հայտնի կդառնան նաև համանախագահողների հայտարարությունից հետո:
