ԵՐԵՎԱՆ, 4 դեկտեմբերի — Sputnik. Հայաստանի ֆուտբոլի ֆեդերացիայի (ՀՖՖ) նախագահի թեկնածուները հայտնի են։ ՀՖՖ նախագահի պաշտոնին հավակնում են 4-ը` լեգենդար ֆուտբոլիստ Խորեն Հովհաննիսյանը, «Լոռի» ակումբի սեփականատեր Թովմաս Գրիգորյանը, ՀՖՖ փոխնախագահ Արմեն Մելիքբեկյանը և «Փյունիկ» ֆուտբոլային ակումբն առաջադրել է Արսեն Աղաջանյանի թեկնածությունը:
Նշենք, որ ՀՖՖ նախագահի ընտրությունը կկայանա դեկտեմբերի 23-ին։ Իսկ թեկնածուների առաջադրման վերջին օրը դեկտեմբերի 3–ն էր։
Sputnik Արմենիայի տեղեկություններով` առաջադրվելու հավակնություններ ունեցել են ևս մի քանի թեկնածուներ, բայց չեն կարողացել, որովհետև ֆուտբոլի ֆեդերացիայի մեջ մտնող ՀԿ–ները հրաժարվել են առաջադրել։
Նշենք, որ ֆեդերացիայի կազմի մեջ մտնող 34 հասարակական կազմակերպությունները կարող էին առաջադրել մեկական թեկնածու։
«Փյունիկ» ՖԱ-ն, ներկայացնելով իրենց առաջադրած թեկնածուին` Արսեն Աղաջանյանին, նշել է, որ նա լիովին համապատասխանում է ՀՖՖ նախագահի բոլոր չափանիշներին: Խոշոր գործարար է, երկար տարիներ ապրել է Ռուսաստանում և Կիպրոսում, համակարգային փոփոխություններ է կատարել այն բոլոր ոլորտներում, որոնք ղեկավարել է, հեղինակություն է վայելում մի շարք երկրների գործարար շրջանակներում: Տասնյակ կրթական, սոցիալական և սպորտային նախագծեր է իրականացրել և իրականացնում Հայաստանում, կամ մասնակից է այդպիսի նախագծերի:
Խորեն Հովհաննիսյանն առաջին օգնություն է ցուցաբերել ուշաթափված պատանի ֆուտբոլիստին
Համաձայն հաղորդագրության` տարիներ շարունակ Աղաջանյանը նպաստել է ֆուտբոլի զարգացմանը հայկական գաղթօջախներում: Նա Կիպրոսի «Արարատ» ֆուտբոլային ակումբի հիմնադիրը և հովանավորն է, ինչպես նաև Ռուսաստանի տարբեր մարզերում գործող մանկապատանեկան հայկական ֆուտբոլային ակումբների բարեկամն ու հովանավորը:
Հիշեցնենք, որ նոյեմբերի 21–ին ՀՖՖ նախագահ Արթուր Վանեցյանը հրաժարական տվեց Հայաստանի ֆուտբոլի ֆեդերացիայի նախագահի պաշտոնից։
