ԵՐԵՎԱՆ, 4 դեկտեմբերի – Sputnik. Հայկական կողմը բավարարված է ՌԴ ԱԳ նախարար Լավրովի` Բաքվում արած հայտարարություններով։ Այս մասին այսօր Աժ–ում հայտարարեց ՀՀ վարչապետ Նիկոլ Փաշինյանը` պատգամավորների հետ հարցուպատասխանի ժամանակ մեկնաբանելով Ադրբեջանի հետ զենքի վաճառքի պայմանագրի մասին տեղեկությունները։
Ցանկացած որոշում պետք է ընդունելի լինի Ադրբեջանի, ՀՀ-ի ու ԼՂ-ի բնակչության համար. Լավրով
«Այդ հարցը լինելու է հայկական պետությունների ուշադրության կենտրոնում և օրակարգում, ու դա կախված չէ որևէ իշխանության ընկալումներից ու ճաշակից, որովհետև ազգային անվտանգության հարց է»,– ասաց Փաշինյանը։
Վարչապետը հիշեցրեց, որ ՀՀ–ն ընդգրկված է ՀԱՊԿ–ում։ Իսկ Բիշքեքում իր ելույթում ինքն առաջ էր քաշել այն հարցը, որ անվտանգության այդ համակարգն ունի բոլոր միջոցներն ու հնարավորությունները տարածաշրջանում նոր էսկալացիա թույլ չտալու համար։
Մնացականյանի և ԵԱՀԿ Մինսկի խմբի համանախագահների հերթական հանդիպումը մեկնարկեց
«Բայց ես ցույց տվեցի, որ տվյալ դեպքում խոսքը ոչ միայն ՀՀ անվտանգության, այլև ՀԱՊԿ անդամ երկրների ու ընդհանրապես տարածաշրջանի մասին է։ Որովհետև, եթե ԼՂ հակամարտության գոտում մենք ունենանք նոր ռազմական էսկալացիա, Ադրբեջանը շատ հետաքրքիր միջավայր կդառնա Սիրիայում իրենց հենարանը կորցնող իսլամական ահաբեկիչների համար»,– ասաց Փաշինյանը։
Հայաստանը, վարչապետի խոսքով, տեղեկություններ ունի, որ ԻՊ կազմում մեծ թվով Ադրբեջանի քաղաքացիներ կան։
«Եթե նրանց հաջողվի Ադրբեջանում որոշակի հենակետ ունենալ կամ ընդլայնել իրենց հենակետը, Ադրբեջանն աշխարհագրորեն շատ հարմար է նրանց համար գործելու դեպի հյուսիս, գործելու դեպի արևելք, գործելու դեպի հարավ և գործելու դեպի արևմուտք։ Իսկ այդ ուղղություններից առնվազն երկուսում ՀԱՊԿ անդամ երկրներ են»,– ասաց Փաշինյանը։
Հիշեցնենք` նոյեմբերի 28-ին ՀՀ վարչապետ Նիկոլ Փաշինյանը մասնակցել է Ղրղզստանի մայրաքաղաք Բիշքեկում կայացած` ՀԱՊԿ երկրների հավաքական անվտանգության խորհրդի նիստին։
