Սարգիս Սեդրակյանի կարծիքով՝ տարիներ շարունակ Հայաստանում իրականացվել է սխալ ագրարային քաղաքականություն: Ոլորտը բարձիթողի վիճակում էր, ինչի պատճառով մշակելի հողատարածքների կեսից ավելին չի մշակվում, դեգրադացվել է ու շարքից դուրս եկել: Գյուղական աղքատությունն աճել է, ավելացել են գյուղական բնակավայրերից արտագաղթի ծավալները:
«Երկրում տեղի ունեցավ հեղափոխություն, ինչի համար անչափ ուրախ էինք՝ ակնկալում էինք մեծ փոփոխություններ, որովհետև հայտարարվեց, թե հեղափոխություն պետք է լինի նաև գյուղատնտեսության ոլորտում: Հակառակ այդ սպասելիքների՝ առանց հիմնավոր բացատրությունների կառավարության կառուցվածքից հանեցին գյուղնախարարությունը»,- նշում է Սարգիս Սեդրակյանը:
«Ֆերմերային շարժում» ՀԿ նախագահը մատնանշում է այն հանգամանքը, որ անհրաժեշտ էր վերոհիշյալ որոշումը կայացնելուց առաջ նախ խորհրդակցել մասնագետների հետ: ԱՄՆ-ի և ՌԴ-ի նման հզոր պետություններն անգամ ունեն գյուղատնտեսության նախարարություն: Հայաստանը նույնպես համարվում էր ագրարային երկիր, որովհետև ՀՆԱ-ի 20-25 տոկոսն, ու զբաղվածության 36 տոկոսն ապահովում էր հենց այս ոլորտը:
Փաշինյանի խոստացած 10 մլն ծառը բյուջեի նախագծով նախատեսված չէ. ովքե՞ր են տնկելու
«Իհարկե, շատ լավ է, որ ցանկանում են զարգացնել բարձր տեխնոլոգիաների բնագավառը, բայց տնտեսության քանի՞ տոկոսն է այն կազմում: Մենք շարունակում ենք մնալ ագրարային երկիր: Պետք է նորմալ պայմաններ ստեղծել գյուղացիների համար, որպեսզի նրանք չլքեն երկիրը»,- նշում է Սարգիս Սեդրակյանը:
Մասնագետի դիտարկմամբ՝ եթե ուզում են մասնագետ, ապա չպետք է բերեն անփորձ անձանց, այլ բերեն տարիների աշխատանքային փորձ ունեցող, արդեն իսկ կայացած մասնագետների, մինչդեռ մեզանում կրճատում են հենց մասնագետներին:
