ԵՐԵՎԱՆ, 3 դեկտեմբերի — Sputnik. Խաչատուրյան քույրերից երկուսը` Քրիստինան ու Անգելինան, հոր սպանության պահին կարող էին գիտակցել գործողությունների բնույթն ու ղեկավարել դրանք, երրորդին հարկադիր բուժում կնշանակեն։ Այս մասին հայտնում է ՌԻԱ Նովոստին` հղում անելով ՌԴ քննչական կոմիտեի պաշտոնական ներկայացուցիչ Սվետլանա Պետրենկոյին։
«Քննության ընթացքում հոգեբանական և հոգեբուժական համալիր փորձաքննությունների անցկացման միջոցով պարզվել է գործով անցնող աղջիկների հոգեկան վիճակը, ընդ որում քույրերից երկուս սպանությունն իրագործելու պահին կարող էին գիտակցել գործողությունների փաստացի բնույթն ու ղեկավարել դրանք», – գրված է հաղորդագրության մեջ։
ՔԿ–ի տվյալներով` քննությունը բավարար ապացույցներ է ձեռք բերել, ինչի հետ կապված Խաչատուրյան երկու քույրերի դեմ հարուցած քրեական գործն ուղարկվել է դատախազին մեղադրական եզրակացությունը հաստատելու համար։
Կրտսեր քրոջ` Մարիայի վերաբերյալ քրեական գործն ուղարկվել է դատախազին բժշկական բնույթի հարկադիր միջոցներ կիրառելու մասին որոշմամբ։
Խաչատուրյան քույրերի եղբայրն ամեն ինչից տեղյակ է եղել ու լռել է. նոր մանրամասներ
Հիշեցնենք` Միխայիլ Խաչատուրյանի աղմկահարույց սպանությունը տեղի էր ունեցել Մոսկվայում 2018 թվականի հուլիսի 27-ին։ 57-ամյա տղամարդու դիակը` վզի և կրծքավանդակի բազմաթիվ կտրած–ծակած վերքերով, հայտնաբերվել էր Մոսկվայի Լոբաչևսկի մայրուղում գտնվող տան շքամուտքում։ Երեք դուստրերը, որոնք մեղադրվում են հոր սպանության մեջ, խոստովանել են, որ իրենք են սպանել հորը։ Քննության ընթացքում պարզվել է, որ Խաչատուրյանը տարիներ շարունակ բռնության է ենթարկել դուստրերին։
ՌԴ մարդու իրավունքների հանձնակատար Տատյանա Մոսկալկովան հայտարարել է, որ դատարանը պետք է հաշվի առնի աղջիկների նկատմամբ հոր բռնության հանգամանքը։
Նա գազան էր, ոչ թե մարդ. Խաչատուրյան քույրերի մայրը չի զղջում ամուսնու մահվան համար
