ԵՐԵՎԱՆ, 3 դեկտեմբերի — Sputnik. Հայաստանի վետերանների խորհուրդը և «Անմահ գունդ» ՀԿ–ն այսօրվանից` դեկտեմբերի 3-ից, սկսում են տոնել Հայրենական մեծ պատերազմում տարած հաղթանակի 75–ամյակին նվիրված միջոցառումները։ Այս մասին Sputnik Արմենիա մուլտիմեդիոն մամուլի կենտրոնում ասաց «ՀՀ անմահ գունդ» ՀԿ–ի նախագահ Գոհար Ղումաշյանը։
«Այսօր աշխարհը տոնում է անհայտ զինվորի հիշատակի օրը, այսօրվանից մեկնարկում են հաղթանակին նվիրված միջոցառումները։ Մեզ համար կարևոր է, որ այս օրը նշվի նաև Հայաստանում», – ընդգծեց նա։
Ղումաշյանն ավելացրեց, որ Հաղթանակի 75–ամյակի տոնակատարություններին մի շարք միջոցառումներ են նվիրված. վավերագրական ֆիլմերի ցուցադրությունից և շարադրությունների մրցույթից մինչև «Անմահ գունդ» ակցիան, որը հաջորդ տարի կանցկացվի նաև մարզերում և Արցախում։ Բոլոր միջոցառումներին մասնակցում են նաև վետերանները։
«Մենք ծրագրում ենք նաև հուշարձանների և կիսանդրիների բացում այն մարզերում, որտեղ դրանք դեռ չկան, որպեսզի ցանկացողները կարողանան հավաքվել և ծաղիկներ խոնարհել», – ասաց Ղումաշյանը։
Ռուսական բանակի և հայ ժողովրդի ողբերգությունը. ՌԴ-ում կարդում են գթասրտության քրոջ նոթերը
Հայաստանի վետերանների միավորման նախագահ Սիմոն Եսայանն էլ նշեց, որ երկրում ընդամենը 274 վետերան են մնացել, որոնց կեսն անկողնային են։ Նրանցից ամենաերիտասարդը 95 տարեկան է։ ՀՀ կառավարությունը վերջերս կրկնակի բարձրացրել է պատվովճարները, ինչը շատ է ուրախացրել պատերազմի մասնակիցներին։
Նա նշեց, որ բոլոր վետերանները, որոնք ի վիճակի կլինեն գալու, կմասնակցեն նախատեսված միջոցառումներին, ամենաակտիվները կմեկնեն Մոսկվա` մասնակցելու Հաղթանակի 75–ամյակի գլխավոր տոնակատարություններին։ Մոսկվան այս տարի բավական մեծ և վառ տոնախմբություն է պատրաստում։
Հայաստանի զորախումբը Մոսկվայում կմասնակցի Մեծ հաղթանակի շքերթին
Հիշեցնենք, որ 1941 թվականի հունիսից մինչև 1945 թվականի մայիսը խորհրդային բանակ է զորակոչվել շուրջ 500 հազար հայ, որոնցից 300 հազարը ծնունդով Խորհրդային Միությունից էին, իսկ 200 հազարը` խորհրդային մյուս հանրապետություններից։ Հիտլերյան Գերմանիայի դեմ պատերազմին ևս 100 հազար հայ մասնակցել են դաշնակիցների շարքում։ Նրանցից ավելի քան 200 հազարը պատերազմից չեն վերադարձել։
