ԵՐԵՎԱՆ, 29 նոյեմբերի – Sputnik. Հայաստանի Հանրապետության պարտքն է ներկայացնել Գևորգ Կոստանյանին վերաբերող բոլոր փաստաթղթերը, իսկ արդեն կալանավորելու որոշումը յուրաքանչյուր երկրի սուվերեն իրավունքն է։ Այս մասին այսօր լրագրողների հետ զրույցում ասաց ՀՀ գլխավոր դատախազ Արթուր Դավթյանը`անդրադառնալով ՀՀ նախկին գլխավոր դատախազ, ՄԻԵԴ–ում ՀՀ նախկին ներկայացուցիչ Գևորգ Կոստանյանի նկատմամբ հետախուզում հայտարարելու մասին ՀՔԾ որոշմանը։
«Յուրաքանչյուր երկիր ինքն է սուվերեն այդ որոշումը կայացնում, թեև այդ սուվերենությունն անսահմանափակ չէ։ Կոնվենցիաներ ունենք նաև հստակ ու կատեգորիկ կարգավորումներ»,– ասաց նա։
Արթուր Դավթյանը հայտնեց, որ անձամբ կապ չի հաստատել Կոստանյանի հետ։ Նրա հետ կապ է հաստատել քննիչը։
«Շատ հրապարակային շփումներ են եղել, բոլորդ տեղյակ եք դրա մասին»,– ասաց Դավթյանը։
Նշենք, որ Գևորգ Կոստանյանը Sputnik Արմենիայի հետ զրույցում իր դեմ հարուցված քրեական գործի վերաբերյալ ասել էր, որ մեկ տարի գտնվել է Հայաստանում այն պահից սկսած, երբ իրեն վկայի կարգավիճակով կանչել են հարցաքննության, և դրանից հետո իր նկատմամբ որևէ գործողություն չի իրականացվել: Այդ ընթացքում պայմանագիր է կնքել ՌԴ դատախազության համալսարանի հետ՝ տեղում դասախոսելու նպատակով:
Գևորգ Կոստանյանի փոխանցմամբ՝ ուսումնական կիսամյակը վերոհիշյալ բուհում կավարտվի դեկտեմբերի վերջին, իսկ առավելագույնը հունվարի 6-ին կավարտվի քննական շրջանը, ինչից հետո նոր կվերադառնա Հայաստան:
Հիշեցնենք, որ Գևորգ Կոստանյանը դեռևս սեպտեմբերին «Մարտի 1–ի» գործով հրավիրվել էր հարցաքննության, սակայն ՀՔԾ–ն հայտնել էր, որ Կոստանյանն արտերկրում է և կվերադառնա 15-20 օրից։ Նա «Մարտի 1»–ի գործով ներգրավվել է որպես մեղադրյալ։
Գևորգ Կոստանյանը քննություն չի հանձնել. ՀՔԾ–ն հորդորում է զերծ մնալ ապատեղեկատվությունից
Ավելին՝ հոկտեմբերի 21–ին ՀՔԾ պետ Սասուն Խաչատրյանը լրագրողների հետ զրույցում ասել էր, որ Կոստանյանը խոստացել է նոյեմբերի սկզբին ներկայանալ Հատուկ քննչական ծառայություն:
Կոստանյանի անունը շրջանառվում էր ՀՀ նախկին ոստիկանապետ Ալիկ Սարգսյանին առաջադրված մեղադրանքի շրջանակում։
Ըստ այդ մեղադրանքի` 2008–ի մարտի 1-ին և 2-ին Երևանում տեղի ունեցած իրադարձություններից հետո Գևորգ Կոստանյանը և Գևորգ Մհերյանը պահանջել են հետին ամսաթվով կազմել և շրջանառության մեջ դնել մարտի 1-ին և 2-ին ոստիկանության կատարած գործողությունների իրավաչափությունը հիմնավորող փաստաթղթեր:
Գևորգ Կոստանյանը 2006 թ. մարտի 14-ին ՀՀ վարչապետի որոշմամբ նշանակվել է ՀՀ արդարադատության նախարարի տեղակալ և այդ պաշտոնը զբաղեցրել է մինչև 2008 թ. հուլիսի 2-ը: 2008 թ. հուլիսին ՀՀ Նախագահի կարգադրությամբ նշանակվել է Հայաստանի Հանրապետության Նախագահի օգնական, ՀՀ կոռուպցիայի դեմ պայքարի մոնիտորինգի հանձնաժողովի նախագահ։ 2011 թ. հունվարի 12-ին ՀՀ նախագահի հրամանագրով նշանակվել է ՀՀ զինվորական դատախազ, ՀՀ գլխավոր դատախազի տեղակալ:
