ԵՐԵՎԱՆ, 29 նոյեմբերի — Sputnik. Արդարադատությունից յուրաքանչյուր խուսափող փախչում է իր «գյորա»։ Այսօր լրագրողների հետ զրույցում նման ձևակերպում արեց ՀՀ գլխավոր դատախազ Արթուր Դավթյանը` արձագանքելով այն տեսակետին, թե բոլոր փախչողները գնում է Ռուսաստան։
«Հեշտ է երևի Ռուսաստան գնալը։ Ռուսաստանը մեր ռազմավարական գործընկերն է, որի հետ շատ ավելի բաց ու ազատ ելումուտի պայմաններ կան։ Այն երկիրը, որի հետ խստացված վիզային ռեժիմ կա, բնականաբար, այդ երկիրը հեշտ չէ գնալ։ Այսինքն` ամեն փախնող իր հնարավորությունների «գյորա» փախնում է»,– ասաց Դավթյանը։
Հարցին, թե արդյոք այդ «գյորայի» մեջ մտնում է նաև Սերժ Սարգսյանի եղբայր Սաշիկ Սարգսյանի որդին, Արթուր Դավթյանը պատասխանեց. «Բոլորի մեջ «գյորան» մտնում է»։
Ամեն դեպքում գլխավոր դատախազը փախուստների մեջ իրավապահների վատ աշխատանքի տարրեր չի նկատել։ Նրա խոսքով` դեպքերն ուսումնասիրվել են ու անօրինականություն չի հայտնաբերվել։
Հիշեցնենք` այս պահին ՌԴ–ում են գտնվում «Մարտի 1»-ի գործով անցնող պաշտպանության նախկին փոխնախարար Միքայել Հարությունյանը, ԴԱՀԿ նախկին պետ Միհրան Պողոսյանը, նախկին գլխավոր դատախազ Գևորգ Կոստանյանը, ՀԿԳ նախկին քննիչ Վահագն Հարությունյանը։
ՊԵԿ նախկին նախագահ Գագիկ Խաչատրյանը Գերմանիայում է։ Սաշիկ Սարգսյանի որդին` Նարեկ Սարգսյանը, որը թաքնվում էր Ֆրանկլին Գոնսալես անվան տակ, գտնվում է Չեխիայի Հանրապետությունում, ու արդեն շուրջ մեկ տարի այդ երկրի իշխանությունները ձգձգում են նրա արտահանձնումը Հայաստանին։
