ԵՐԵՎԱՆ, 28 նոյեմբերի — Sputnik. ՀՀ կառավարության որոշմամբ այսօր ՀՀ ԱԻՆ Փրկարար ծառայությանը բյուջեից հատկացնել 475 747 600 դրամ գումար` կառավարության պահուստային ֆոնդից։
Ինչպես նախագծի ներկայացման ժամանակ հայտնեց ՀՀ ԱԻ նախարար Ֆելիքս Ցոլակյանը, գումարը նախատեսված է փրկարարներին առանձնահատուկ պայմաններում աշխատելու համար տրվող հավելումները վճարելու համար։
«Սա աշխատավարձերի բարձրացման 3 ամսվա փողն է, որ այս տարի դեռ չենք տվել։ Խոսքը 3 ամիսների` սեպտեմբերի, հոկտեմբերի, նոյեմբերի մասին է»,– հայտնեց Ցոլակյանը` պարզաբանելով, որ հաջորդ տարվա հավելավճարներն արդեն նախատեսված են 2020թ.-ի բյուջեում, բայց 2019թ–ի համար կառավարության որոշմամբ բարձրացված աշխատավարձերը բյուջեում նախատեսված չեն եղել։ Հետևաբար, անհրաժեշտություն է առաջացել դրանք վճարելու համար հատկացնել պահուստային ֆոնդից։
Նիստը վարող փոխվարչապետ Տիգրան Ավինյանը նաև հետաքրքրվեց, թե վերջին բարձրացումից հետո որքան միջին աշխատավարձ է ստանում հայ փրկարարը։
«Առանց պարգևավճարների ամենացածր պաշտոններում 130 000 դրամին մոտ»,– ասաց Ցոլակյանը` հիշեցնելով, որ մինչ այդ նույն պաշտոններում աշխատավարձը 80-90 հազար դրամ էր։
Բարձրացրել են աշխատավարձը, բնակարանային հարցերն էլ կլուծեն. Ցոլակյանն ամփոփում է տարին
Հիշեցնենք, որ օգոստոսի 27–ին ՀՀ վարչապետ Նիկոլ Փաշինյանի և ԱԻ նախարար Ֆելիքս Ցոլակյանը խորհրդակցությամբ արդյունքում որոշվեց բարձրացնել փրկարարների աշխատավարձը։
Մարտ 4–ի կառավարության նիստում ՀՀ արտակարգ իրավիճակների նախարար Ֆելիքս Ցոլակյանը բարձրացրել էրփրկարարների ցածր աշխատավարձի խնդիրը։ Այս տարի հանրապետության տարբեր մասերում տեղի ունեցած ծանր հրդեհների ֆոնին, այս թեման կրկին ակտուալ դարձավ։ Sputnik Արմենիան ևս անդրադարձավ խնդրին և ներկայացրեց հրշեջ–փրկարարի ծանր աշխատանքը, դրա հետ անհամատեղելի ցածր աշխատավարձն ու տեխնիկական ոչ հագեցած վիճակը։
