ԵՐԵՎԱՆ, 28 նոյեմբերի — Sputnik. ՀՀ վարչապետ Նիկոլ Փաշինյանն ու Ղրղըզստանի նախագահ Սորոնբայ Ժեենբեկովը համագործակցության հարցեր են քննարկել։ Այս մասին գրված է Ղրղըզստանի նախագահի պաշտոնական կայքում։
Հանդիպումը կայացել է այսօր` նոյեմբերի 28–ին, Բիշքեկում ընթացող ՀԱՊԿ գագաթնաժողովի շրջանակում։
Կողմերը քննարկել են հարցերի լայն շրջանակ և երկկողմ հարաբերությունների զարգացման հեռանկարները, այդ թվում` փոխգործակցություն միջազգային կազմակերպությունների շրջանակում։
Փաշինյանն ու Ժեենբեկովը պատրաստակամություն են հայտնել ամրապնդել համագործակցությունը Հայաստանի և Ղրղըզստանի միջև։
Հիշեցնենք, որ նոյեմբերի 27-ին ՀՀ կառավարական պատվիրակությունը վարչապետ Նիկոլ Փաշինյանի գլխավորությամբ Բիշքեկ էր մեկնել` մասնակցելու նոյեմբերի 28-ին կայանալիք ՀԱՊԿ հավաքական անվտանգության խորհրդի նիստին։ Գագաթնաժողովին մասնակցելու են նաև Ռուսաստանի, Ղազախստանի, Ղրղըզստանի, Բելառուսի և Տաջիկստանի նախագահները։
Բիշքեկում մեկնարկել է ՀԱՊԿ անդամ երկրների բարձրաստիճան պաշտոնյաների հանդիպումը
Ենթադրվում է, որ պետության ղեկավարները որոշում կընդունեն` գլոբալ և տարածաշրջանային անվտանգության նպատակով միջազգային փոխգործակցությունը և համագործակցությունը կատարելագործելու մասին։
ՀԱՊԿ անդամ է 6 երկիր` Հայաստանը, Բելառուսը, Ղազախստանը, Ղրղըզստանը, Ռուսաստանն ու Տաջիկստանը։
