ԵՐԵՎԱՆ, 26 նոյեմբերի — Sputnik. ՀՔԾ ղեկավար Սասուն Խաչատրյանը լրագրողների հետ զրույցում չպատասխանեց հարցին, թե արդյո՞ք ՀՀ նախկին գլխավոր դատախազ Գևորգ Կոստանյանի նկատմամբ հետախուզում կհայտարարվի։ Նա կոչ արեց բոլորին սպասել մինչև երկիր վերադառնալու համար Կոստանյանին տված 48 ժամն անցնի։
ՀՀ նախկին գլխավոր դատախազ Գևորգ Կոստանյանը «Մարտի 1»-ի գործով մեղադրյալ է։ Նոյեմբերի 25-ին Կոստանյանին առաջարկել են 48 ժամվա ընթացքում ներկայանալ քննչական մարմին։
ՀՔԾ ղեկավարն արձագանքել է նախկին գլխավոր դատախազի հայտարարությանն այն մասին, թե սահմանված ժամկետն «իրատեսական չէ»։ «Իսկ դուք իրատեսակա՞ն եք համարում Մոսկվայից Երևան 48 ժամվա ընթացքում վերադառնալը։ Կոստանյանի հայտարարությունները ես չեմ մեկնաբանի», – ասաց Խաչատրյանը։
Եթե Գևորգ Կոստանյանը չվերադառնա, ապա ՀՔԾ ղեկավարի խոսքով, իրենք կգործեն օրենքի շրջանակում։ Միևնույն ժամանակ նա չպարզաբանեց, թե արդյո՞ք Կոստանյանի նկատմամբ հետախուզում կհայտարարվի։
«Եկեք 48 ժամը սպասենք, լա՞վ», – ասաց Խաչատրյանը։
Հարցին, թե ինչու հերթական անգամ ինչ–որ մեկը գործում մեղադրյալ է ներգրավվում այն բանից հետո, երբ Հայաստանից հեռանում է, Խաչատրյանը պատասխանեց, որ նախկինում դրա համար անհրաժեշտ ապացույցներ չկային։ Այժմ դրանք կան։
Գևորգ Կոստանյանը կխոսի Հրայր Թովմասյանի քրեական հետապնդման մասին. «Հրապարակ»
Հատուկ քննչական ծառայությունը հայտարարել է, որ Գևորգ Կոստանյանը կասկածվում է 2008 թվականի մարտի 1–ի հակաիրավական գործողությունների կատարման մասին փաստերը կոծկելու ճանապարհով պաշտոնական լիազորությունների չարաշահման մեջ։ Կոստանյանն այդ ժամանակ ՄԻԵԴ–ում ՀՀ կառավարության լիազոր ներկայացուցիչ էր, ՀՀ արդարադատության նախարարի տեղակալը, իսկ 2008 թվականի հուլիսի 2-ից դարձել է ՀՀ նախագահի օգնականը։
2013-2016 թվականներին Կոստանյանը զբաղեցրել է ՀՀ գլխավոր դատախազի պաշտոնը, 2017 թվականի ապրիլին ՀՀԿ համամասնական ցուցակով պատգամավորի մանդատ է ստացել։
Փորձ է արվում Մարտի 1–ի քրգործում հնարավորինս մեծ թվով հնչեղ անուններ ներգրավել. Կոստանյան
«Մարտի 1»-ի գործով անցնում են նախկին նախագահ Ռոբերտ Քոչարյանը (գտնվում է կալանքի տակ), նախկին փոխվարչապետ Արմեն Գևորգյանը, պաշտպանության նախկին նախարար Սեյրան Օհանյանը և Գլխավոր շտաբի նախկին պետ Յուրի Խաչատուրովը։ Այն ժամանակ, նախագահական ընտրություններից հետո, ընդդիմության և իրավապահ ուժերի բաժումների ընթացքում 10 մարդ էր զոհվել։
