ԵՐԵՎԱՆ, 25 նոյեմբերի — Sputnik. ԵԱՏՄ–ն պատրաստվում է ազատ առևտրի համաձայնագիր կնքել Սերբիայի Հանրապետության հետ։ Այս մասին այսօր ԱԺ տարածաշրջանային և եվրասիական ինտեգրման հարցերի մշտական հանձնաժողովի նիստում հայտնեց ՀՀ ԱԳ փոխնախարար Շավարշ Քոչարյանը։
Իրանի և ԵԱՏՄ–ի միջև ազատ առևտրի գոտին կսկսի գործել հոկտեմբերի վերջին. Ռոհանի
Նա նշեց, որ Սերբիայի հետ ԵԱՏՄ անդամ երեք երկրներ` ՌԴ–ն, Բելառուսն ու Ղազախստանն այսօր էլ երկկողմ համաձայնագրերի հիման վրա ազատ առևտուր են վարում։
«Այս համաձայնագրով այդ երեք երկրներին միանում են նաև ԵԱՏՄ անդամ մյուս 2 երկրները։ Իհարկե, ամեն դեպքում անհրաժեշտ է վերլուծություն` ինչ է տվել անցած ժամանակահատվածում ամեն մի երկիր, ինչ է ստացել Հայաստանն ու արդյոք կորուստներ կրել է, թե ոչ։ Իմ տեղեկություններով` առ այսօր մենք որևէ միջազգային համաձայնագրի գործունեության արդյունքում կորուստներ չենք ունեցել»,– ասաց Քոչարյանը։
ԵԱՏՄ համաձայնագրերի շրջանակում Հայաստանի քաղաքական շահերի պաշտպանության մասին պատգամավորների հարցերին ի պատասխան Քոչարյանը հայտնեց, որ ԵԱՏՄ շրջանակում որոշումներն ընդունվում են կոնսենսուսով, և ցանկացած երկիր ունի վետոյի իրավունք։
«Եթե կա պետություն, որի հետ քո քաղաքական շահերը հակադիր են, ապա ինչպես էլ հիմնավորեն, որ այդ երկրի հետ տնտեսական շահ կա, կան դեպքեր, երբ դու կարող ես համաձայնության չգնալ` անկախ նրանից, թե ինչ են ցույց տալիս թվերը։ Օրինա՝ կոպիտ ասած, պետություն է, որը քեզ չի ճանաչում։ Ինչպե՞ս կարող ես նրա հետ գնալ տնտեսական համագործակցության»,– ասաց նա` շեշտելով, որ ասվածն այս պահին Սերբիային չի վերաբերում։
Քննարկման արդյունքում հանձնաժողովը դրական եզրակացության արժանացրեց 2018 թվականի մայիսի 14-ին ստորագրված «Երրորդ պետությունների, միջազգային կազմակերպությունների կամ միջազգային ինտեգրացիոն միավորումների հետ՝ Եվրասիական տնտեսական միության միջազգային պայմանագրերի մասին» համաձայնագիրը վավերացնելու մասին Հայաստանի Հանրապետության օրենքի նախագիծը։ Այն առաջիկայում կներառվի ԱԺ նիստերի օրակագրում։
Սերբիան կստորագրի ԵԱՏՄ-ի ազատ առևտրի համաձայնագիրը. Միրզոյանը հանդիպել է սերբ գործընկերոջը
Հիշեցնենք` Եվրասիական տնտեսական միության և Սերբիայի միջև ազատ առևտրի գոտու ստեղծման համաձայնագիրը ստորագրվել է 2019թ հոկտեմբերի 25-ին ՌԴ մայրաքաղաք Մոսկվայում կայացած Եվրասիական միջկառավարական խորհրդի նիստի ընթացքում։ Այդ քննարկման ժամանակ հայտարարվեց, որ Սերբիայի և ԵԱՏՄ երկրների միջև առևտրի ծավալը 2018թ.–ին կազմել է 3 միլիարդ 400 միլիոն դոլար։
