ԵՐԵՎԱՆ, 25 նոյեմբերի — Sputnik. Փաստաբան Հովհաննես Չամսարյանի փաստաբանական գրասենյակից ԱԱԾ քննիչը ցանկանում է առգրավել 2 համակարգիչ: Այս մասին հայտարարություն է տարածել Փաստաբանների պալատը։
«Փաստաբանների պալատի ներկայացուցիչներն այլ փաստաբանների հետ գտնվում են այդ գրասենյակում և չեն թույլատրում համակարգիչների առգրավումը»,–նշված է հաղորդագրության մեջ։
Ավագ քննիչը ձերբակալվել է` նորակոչիկներին խոշոր կաշառքով զինծառայությունից ազատելու համար
ՀՀ Մարդու իրավունքների պաշտպան Արման Թաթոյանի Facebook–ի պաշտոնական էջում էլ նշված է, որ այս պահին ՄԻՊ աշխատակազմի արագ արձագանքման խումբը մեկնել է փաստաբանական այն գրասենյակ, որտեղ գտնվում է քննիչը՝ քրգործի շրջանակում փաստաբանի համակարգիչն առգրավելու նպատակով։
Ավելի վաղ օգտատեր Շուշան Թադևոսյանը սոցցանցում գրառում էր կատարել ու հայտնել, որ քննիչը ցանկանում է առգրավել փաստաբան Հովհաննես Չամսարյանի համակարգիչը մի քրեական գործի շրջանակում, որտեղ վերջինս հանդես է եկել որպես վկաների ներկայացուցիչ: Համակարգիչը, ըստ գրառման, պարունակում է փաստաբանական գաղտնիք, որն օրենքով անձեռնմխելի է: Թադևոսյանի խոսքով` սա բացահայտ ոտնձգություն է փաստաբանի գործունեության նկատմամբ։
Հիշեցնենք, որ «Փաստաբանության մասին» ՀՀ օրենքի 21-րդ հոդվածի 6-րդ և 7-րդ մասերի համաձայն՝ փաստաբանի բնակարանը, տրանսպորտային միջոցը կամ գրասենյակը, ինչպես նաև փաստաբանական կազմակերպության գրասենյակը չեն կարող խուզարկվել փաստաբանական գործունեության հետ առնչվող հանգամանքները պարզելու կապակցությամբ: Բացի այդ, փաստաբանի մոտ կամ փաստաբանական կազմակերպության գրասենյակում գտնվող իրավաբանական օգնությանը վերաբերող փաստաթղթերը և տեղեկատվական կրիչները (համակարգիչները, տեսաձայնագրող սարքերը, լազերային սկավառակները, տեսաժապավենները և այլն) անձեռնմխելի են, չեն կարող առգրավվել (վերցվել) և չեն կարող որպես ապացույց օգտագործվել: