ԵՐԵՎԱՆ, 24 նոյեմբերի — Sputnik. Ավարտվեց «Մանկական Եվրատեսիլ 2019» երգի միջազգային մրցույթը, որն անցկացվեց Լեհաստանի Գլիվիցե քաղաքում: Մրցույթում կրկին հաղթեց Լեհաստանի մասնակիցը։ Վիկտորյա Գաբորն իր Superhero երգով 278 միավոր հավաքեց:
Մրցույթի հայաստանյան մասնակիցը՝ Կարինա Իգնատյանը, ներկայացավ «Colors of your dream» երգով և զբաղեցրերց 9-րդ հորիզոնականը։ Հեռուստադիտողների և ժյուրիի քվեարկության արդյունքում Հայաստանն ընդհանուր առմամբ վաստակեց 115 միավոր:
Ավստրալիան մեր մասնակցին տվեց 8, Ֆրանսիան՝ 5, Ռուսաստանը՝ 10, Մակեդոնիան՝ 6, Իսպանիան՝ 7, Բելառուսը՝ 3, Վրաստանը՝ 7 Մալթան՝ 2, Ղազախստանը՝ 5, Լեհաստանը՝ 3, Ուկրաինան՝ 4, Պորտուգալիան՝ 4 ,Ալբանիան՝ 6 միավոր: Հայաստանը 12 միավորը տվեց Նիդեռլանդներին:
«Երազում եմ հաղթել և մրցույթը բերել Հայաստան». «Մանկական Եվրատեսիլի» մասնակիցը շնորհակալ է
Նշենք, որ «Colors of your dream» երգի խոսքերի հեղինակներն են Ավետ Բարսեղյանն ու Մարգարիտա Դորոշևիչը, երաժշտության հեղինակը` ռուս կոմպոզիտոր Տարաս Դեմչուկը։
Մրցույթին մասնակցեցին 19 երկրի՝ Ավստրալիայի, Ֆրանսիայի, Ռուսաստանի, Հյուսիսային Մակեդոնիայի, Իսպանիայի, Վրաստանի, Բելառուսի, Մալթայի, Ուելսի, Ղազախստանի, Լեհաստանի, Իռլանդիայի, Ուկրաինայի, Նիդեռլանդների,Հայաստանի, Պորտուգալիայի, Իտալիայի, Ալբանիայի, Սերբիայի ներկայացուցիչները։
«Մանկական Եվրատեսիլ» մրցույթի փորձի ժամանակ ռուս մասնակիցն ուշագնաց է եղել
«Մանկական Եվրատեսիլի» առաջին մրցույթն անցկացվել է 2003 թվականին:
Հայաստանը «Մանկական Եվրատեսիլ» երգի միջազգային մրցույթին մասնակցում է 2007-ից և հասցրել է հաջողություններ գրանցել. 2011 թվականին այս մրցույթում Վլադիմիր Արզումանյանի հաղթանակը հնարավորություն ընձեռեց 2012 թվականին մրցույթի մասնակից երկրներին հյուրընկալել Հայաստանում:
