ՀՀ կառավարությունն ավելի ռադիկալ գտնվեց և ԱԺ ներկայացավ օրենսդրական փոփոխությամբ՝ 63 000-ի փոխարեն ներկայացնելով 68 հազարի տարբերակը: Sputnik Արմենիայի հետ զրույցում այս մասին ասաց տնտեսագետ Ատոմ Մարգարյանը` անդրադառնալով Հայաստանում նվազագույն աշխատավարձի բարձրացման հարցին։
Աշխատավարձերը նորից են բարձրացրել. որքան է լինելու ուսուցչի նվազագույն աշխատավարձը
Ատոմ Մարգարյանի կարծիքով՝ այդ քայլը նախ բխում է Հայաստանի միջազգային պարտավորություններից՝ որպես ԵԽ անդամ երկիր, որը 2004թ.-ին վավերացրել է «Սոցիալական խարտիան»։ Դրա մեջ կա հստակ արձանագրում առ այն, որ երկրում նվազագույն աշխատավարձը չպետք է պակաս լինի միջին աշխատավարձի 50 տոկոսից, սակայն համամասնությունը մեզ մոտ կրկին չի պահպանվել: Նվազագույն աշխատավարձի մասին նման օրենքներ չեն գործում նույնիսկ ԵԽ անդամ յոթ երկրներում, ինչն ունի իր հիմնավորումներն ու պատճառները:
«Ընդհանրապես, աշխարհում կա նվազագույն աշխատավարձի երկու մոդել: Երկրների մեծ մասում հարցը կարգավորվում է օրենքներով, իսկ երկրորդ մոդելի համաձայն՝ ոչ մի օրենք էլ չի ընդունվում, այլ պարզապես կնքվում են ոլորտին առնչվող ամենամյա համաձայնագրեր կոնսոլիդացված գործատուների և արհմիությունների միջև, ինչը նույնպես ռացիոնալ և ճկուն մոտեցում է, որովհետև հաշվի է առնում տվյալ ճյուղի, ոլորտի առանձնահատկությունները»,- նշում է Ատոմ Մարգարյանը:
Որքան է նվազագույն աշխատավարձն ավելացել ՀՀ–ում
Տնտեսագետի դիտարկմամբ՝ եթե մենք հաստատում ենք ընդհանուր նվազագույն աշխատավարձի չափը, ապա պետք է հաշվի առնել, որ տնտեսության տարբեր բնագավառներում միջին աշխատավարձերն անհամաչափ են: Օրինակ՝ էներգետիկ համակարգում միջին աշխատավարձը 400 հազար դրամ է, իսկ կրթական համակարգում շատ ավելի ցածր է, հետևաբար, երկրորդ մոդելն ավելի ճկուն մոտեցումներ է ենթադրում:
Ատոմ մարգարյանը կարծում է, որ նվազագույն աշխատավարձի այս մակարդակը մի քիչ մոտ է նվազագույն սպառողական զամբյուղի արժեքին, բայց եթե ելնենք ԵԽ «Սոցիալական խարտիայով» սահմանված նվազագույն ֆորմալ նորմատիվից, ապա իհարկե 50 տոկոսից ցածր է, ու այս պրակտիկան գործում է ԵԱՏՄ երկրների մակարդակով: Համեմատությունը ցույց է տալիս, որ խզումը չափազանց մեծ է:
