ԵՐԵՎԱՆ, 23 նոյեմբերի – Sputnik. Համացանցում տարածված տեսանյութի առնչությամբ, որտեղ երևում է, թե ինչպես են քրեական հետախուզության ծառայողները բռնի ուժով ցուցմունք կորզում, Հատուկ քննչական ծառայությունում վարույթ է իրականացվում։ Այս մասին հայտնում է ՀՀ ոստիկանությունը` անդրադառնալով երեկ տարածված տեսանյութին, որտեղ ոստիկանները հակագազով ու մահակով ցուցմունք էին կորզում։
«Հիշյալ տեսանյութին առնչվող հրապարակումների ու վարկածների իսկությունը ստուգելու նպատակով ոստիկանության պետի ժամանակավոր պաշտոնակատարի հանձնարարությամբ ստուգումներ են սկսվել ոստիկանության ներքին անվտանգության վարչությունում»,–նշված է ոստիկանության հաղորդագրության մեջ։
Միաժամանակ, ոստիկանությունը հայտնում է, որ քրեական հետախուզություն ծառայությունում աշխատում են բազմաթիվ ծառայողներ, որոնց գերակշիռ մասը` ոստիկանության մարզային վարչություններում ու տարածքային բաժիններում: Իսկ քրեական հետախուզության գլխավոր վարչությունն իրականացնում է այդ աշխատանքը համակարգելու գործառույթ:
Այսինքն, ըստ ոստիկանության` հիշյալ վարչության ղեկավարությունն ու անձնակազմը գործնականում չի կարող տեղեկացված լինել տարածքային մարմինների և հատկապես բոլոր աշխատասենյակներում տեղի ունեցող ամենօրյա գործողություններից:
Սերժ Սարգսյանը Ռոբերտ Քոչարյանի դեմ ցուցմունք չի տվել. փաստաբան
Հիշեցնենք, որ թեմային անդրադարձել էր նաև ՀՀ մարդու իրավունքների պաշտպան Արման Թաթոյանը` ասելով, որ իր ստորագրությամբ համապատասխան պաշտոնական գրություն է ուղարկելու քրեական հետապնդման մարմնին։ Նա նաև նշել էր, որ իր ուշադրության կենտրոնում է պահելու հարցը։
