Sputnik Արմենիայի «ԱրտԲոքս» հաղորդաշարի եթերում աշխարհահռչակ թավջութակահար Նարեկ Հախնազարյանը, Մոսկվայի Կոնսերվատորիայի պրոֆեսոր, ջութակահար Սուրեն Հախնազարյանը և ջութակահար, պրոդյուսեր Խաչատուր Ալմազյանը խոսեցին Սուրեն Հախնազարյանի 70-ամյա հոբելյանին նվիրված գալիք համերգի և սպասվող անակնկալների մասին։ Ի դեպ, հոբելյանական համերգը կկայանա այսօր` նոյեմբերի 22–ին, «Արամ Խաչատրյան» համերգասրահում։
Համերգին կմասնակցեն նաև դաշնակահար, պրոֆեսոր Գայանե Հախնազարյանը, դիրիժոր Տիգրան Հախնազարյանը, դիրիժոր Էդուարդ Թոփչյանը:
Կարելի է ասել` համերգն ընտանեկան է։ Գաղտնիք չէ, որ Սուրեն Հախնազարյանը հայտնի թավջութակահար Նարեկ Հախնազարյանի հայրն է, Տիգրանը՝ նրա եղբայրը։ Իսկ Գայանե Հախնազարյանն այս երաժշտական ընտանիքում ունի ամենակարևոր դերը`նա Նարեկի և Տիգրանի մայրն է։ Խաչատուրն Ալմազյանն էլ ընտանիքի հետ բարեկամական կապ ունի։
Բանախոսները նաև անդրադարձան մշակութային քաղաքականությանն ու դասական երաժշտության հանրայնացման խնդրին:
«Երբեք պետք չէ զղջալ երաժշտական կրթություն ստանալու համար, անգամ եթե մարդ դա այլևս երբեք չկիրառի, այն մեծ հետք է թողնում իր աշխարհընկալման վրա», - ասաց Նարեկ Հախնազարյանը:
Ի՞նչը ստիպեց Նարեկ Հախնազարյանին թավջութակահար դառնալ. տեսանյութ
Նոյեմբերի 22-ին կայանալիք համերգի առաջին բաժնում կհնչի կամերային ծրագիր՝ Հախնազարյանների կատարմամբ, իսկ երկրորդ բաժնում Հայաստանի ազգային ֆիլհարմոնիկ նվագախմբի հետ ելույթ կունենան Նարեկ Հախնազարյանն ու ջութակահար Խաչատուր Ալմազյանը: Կհնչեն Սեն-Սանսի «Մուսան և պոետը» և իտալացի հանրահայտ կոմպոզիտոր Ջովանի Սոլլիմայի «Tarantulae Cadenzas» ստեղծագործությունները:
Ֆուտբոլի նկատմամբ ունեցած սերն ինձ թավջութակահար դարձրեց. Հախնազարյանի խոստովանությունը
Ի դեպ, Սոլլիմայի այս ստեղծագործությունը առաջին անգամ է հնչելու Հայաստանում, ավելին՝ այն գրվել է հենց Նարեկ Հախնազարյանի պատվերով:
