Դերասան Արտյոմ Կարապետյանին սպառնացած երթուղային տաքսու վարորդը հայտնաբերվել է։ Այս մասին հայտնում է ՀՀ ոստիկանության կայքը։
Նոյեմբերի 19-ին դերասան Արտյոմ Կարապետյանը Facebook-ի իր էջում տեսանյութ էր հրապարակել՝ հայտնելով իր և երթուղային տաքսու վարորդի միջև տեղի ունեցած միջադեպի մանրամասները։ Հրապարակման հիման վրա ոստիկանության Մաշտոցի բաժնում սկսվել է նյութերի նախապատրաստման գործընթաց, որի շրջանակներում տեսագրությունը մանրամասն ուսումնասիրվել է։
«Հետագա միջոցառումներով ոստիկանության Մաշտոցի բաժնի և Դավթաշենի բաժանմունքի քրեական հետախույզները պարզեցին երթուղային տաքսու վարորդի ինքնությունը։ Տարված բացատրական աշխատանքի շնորհիվ Երևանի բնակիչ, 61-ամյա տղամարդը նոյեմբերի 22-ին ներկայացավ ոստիկանության Դավթաշենի բաժանմունք ու խոստովանեց իր կողմից Արտյոմ Կարապետյանի հասցեին սպառնալիքներ հնչեցնելու փաստը»,–ասվում է ոստիկանության հաղորդագրության մեջ։
Քաղաքային գնացք` անվադողերի վրա. չինական նորարարությունը գրավում է համացանցը
Հանգամանքները պարզվում են։ Քննությունը շարունակվում է։
Հիշեցնենք, որ երեկ` նոյեմբերի 21-ին ոստիկանության Երևան քաղաքի վարչության, ենթակա տարածքային բաժինների ու ճանապարհային ոստիկանության առաջին սպայական գումարտակի ծառայողները ուժեղացված ծառայություն են իրականացրել մայրաքաղաքում: Նրանք տարբեր իրավախախտումների համար կանգնեցրել են հասարակական տրանսպորտ հանդիսացող միկրոավտոբուսներ, արդյունքում որոշ «Գազելների» վարորդների մոտից հայտնաբերել դանակներ։
