ԵՐԵՎԱՆ, 21 նոյեմբերի – Sputnik. Արթուր Վանեցյանը հրաժարական տվեց Հայաստանի ֆուտբոլի ֆեդերացիայի նախագահի պաշտոնից։ Այս մասին այսօր կայացած ՀՖՖ գործկոմի նիստից հետո լրագրողներին ասաց ինքը`Վանեցյանը։
«Իտալիայում մեր հավաքականի պարտությունն աննախադեպ էր, մեզ համար այն մտահոգիչ էր, ու հարցերին պետք է լուծում տրվեր: Քննարկման ժամանակ ես առաջարկեցի գործկոմի անդամներին ընդունել իմ հրաժարականի դիմումը: Գործկոմում ունեցանք երկար քննարկում»,-ասաց Վանեցյանը: ՀՖՖ գործկոմն ընդունել է Վանեցյանի հրաժարականի դիմումը։
Արթուր Վանեցյանն ընդգծեց, որ հրաժարականի խնդիրը պետք չէ քաղաքականացնել։ «Եթե մեր հարաբերությունները լարված լինեին, հիմա իրար կողքի կանգնած չէինք լինի։ Իսկ թե քաղաքական դաշտում ով ինչ գործունեություն կծավալի, յուրաքանչյուրի անձնական գործն է. այստեղ քննարկել ենք միայն ֆուտբոլային հարցեր։ Ես եմ իմ նախաձեռնությամբ թողել ՀՖՖ նախագահի պաշտոնը»,–ասաց Վանեցյանը` հավելելով, որ այդ աննախադեպ պարտության համար որևէ մեկը պետք է բարոյական պատասխանատվություն կրեր։
«Ով է մեղավոր, լավ հարց է». հավաքականի կրած պարտությունը Փաշինյանը խոշոր տապալում է կոչում
Նշենք, որ ՀՖՖ գործկոմի այսօրվա նիստը նվիրված է եղել հայկական ֆուտբոլում ստեղծված իրավիճակի քննարկմանը, դրան մասնակցել են գրեթե բոլոր անդամները:
Հիշեցնենք, որ ԵՎՐՈ 2020–ի ընտրական փուլի վերջին` «Իտալիա»–«Հայաստան» հանդիպումն ավարտվեց մեր հավաքականի պարտությամբ։ Գրանցվեց 1։9 աննախադեպ հաշիվ։
ՀՖՖ–ն դատապարտում է Հենրիխ Մխիթարյանին` ավագի թևկապից զրկելու կարծիքը. Վանեցյան
Հիշեցնենք նաև, որ Արթուր Վանեցյանը Հայաստանի ֆուտբոլի ֆեդերացիայի նախագահ է նշանակվել 2018թ.–ի սեպտեմբերի 22–ին։ Այդ ժամանակ նա նաև ՀՀ ԱԱԾ տնօրենն էր։
