ԵՐԵՎԱՆ, 16 նոյեմբերի — Sputnik. Նելլի Դանիելյան. ՀՀ կառավարությունը ձախողել է սոցիալական ոլորտի բարեփոխումները։ Նման տեսակետ Sputnik Արմենիայի հետ զրույցում հայտնեց տնտեսագետ Թադևոս Ավետիսյանը։
Նրա հաշվարկով` սոցիալական ծրագրերը 2019 թվականի 9 ամիսների կտրվածքով թերակատարվել են 50 տոկոսով, այլ կերպ ասած` տարվա ¾-րդն անցել է, իսկ ծրագրերի կեսը դեռ չի կատարվել։
«2019թ.–ին հաշմանդամություն ունեցող անձանց զբաղվածության կարևորագույն ծրագրերը 4 անգամ նվազել են։ Առանց խնդիրները հասկանալու, լիարժեք գնահատելու, էլի անունը դնելով կոռուպցիայի դեմ պայքար և այլն, առանց պատշաճ կարգով մարդկանց տեղեկացնելու, 2019թ.–ին իրենց փնթի կառավարման հետևանքով այդ ծրագիրը չիրականացվեց»,– ասաց Ավետիսյանը ` շեշտելով, որ հաշմանդամների համար զբաղվածության խնդիրն ամենակարևորներից է, իսկ չեղարկված ծրագիրը վերաբերում էր կոնկրետ քաղաքացիների։
Համեմատության համար Ավետիսյանը նշեց, որ թերակատարվել են ոչ միայն այս, այլև նախորդ` 2018թ.-ի ծրագրերը։ Ընդ որում, եթե այս տարի առայժմ 50 տոկոսով, ապա նախորդ տարի` 75-ով։
«Օրինակ` զբաղվածության ոլորտում պետական ծրագրերի կատարողականը 2018թ.-ին եղել է 25%, այսինքն` պետական բյուջեում այդ ծրագրերի համար դրված չնչին գումարը` 250 000 գործազուրկի համար ընդամենը 1.7 մլրդ դրամ, միայն 25 տոկոսով է ծախսվել։ Այսինքն` այդ ծրագրերը չեն կատարվել, շուրջ 200 000 մարդ չի ստացել օրենքով իրեն հասանելի աջակցությունը»,– ասաց Ավետիսյանը։
Հայ խոպանչիներն արտոնյալ են. Ռուսաստանը միգրանտներին արգելում է աշխատել որոշ ոլորտներում
Ավետիսյանը շեշտեց, որ Հայաստանը սահմանադրորեն սոցիալական երկիր է, ու նա Աշխատանքի և սոցիալական հարցերի նախարարությանը մեղադրեց Սահմանադրության պահանջն անտեսելու համար։
«Քանի դեռ Սահմանադրությունն էլ չեն փոխել, պարտավոր են իրականացնել զբաղվածության, բազմազավակ ընտանիքներին աջակցության ծրագրեր»,– ասաց տնտեսագետը։
Աշխատանքի և սոցիալական հարցերի նախարարությունից, ի պատասխան Sputnik Արմենիայի հարցմանը, հաստատեցին` սոցիալական ծրագրերի թերակատարում, իսկապես, կա։
Պաշտոնական տվյալներով` 2019 թ.–ի 9 ամիսներին զբաղվածության ծրագրերը կատարվել են 70%–ով, այն դեպքում, երբ 2018 թ.–ի նույն ժամանակահատվածում կատարողականը կազմել էր 32 %, իսկ տարեվերջին՝ 68.6 %:
Ծրագրերի թերակատարումները, նախարարության տրամադրած մեկնաբանության համաձայն, հետևանք են սոցիալական ծրագրերում կատարված ու կատարվող փոփոխությունների։
«Ներկայումս հաստատման փուլում է ծրագրերի իրականացման ընթացակարգերը փոփոխելու վերաբերյալ կառավարության որոշման նախագիծը, որով բարելավվում է դրանց իրականացման կարգը: Կատարվող փոփոխությունները միանշանակ կնպաստեն ծրագրերի արդյունքների բարելավմանը»,– հայտնում են նախարարությունից:
Ինչ վերաբերում է կոնկրետ զբաղվածության ծրագրերին, ապա 2019թ.–ի նոյեմբերի 12-ի դրությամբ Զբաղվածության կարգավորման 2019 թ.-ի ծրագրում պաշտոնական տվյալներով ընդգրկված է 5207 մարդ, թեև ակնկալվող թիվը 9172 է։
Նախարարության հավաստմամբ` 2018 թ.–ի սոցիալական ծրագրերի 31.4 %-ով թերակատարումը ևս պայմանավորված է եղել ծրագրերի ընթացակարգերի փոփոխություններով։
Ընդ որում, այդ փոփոխությունը մեկնարկել է դեռ «թավշյա հեղափոխությունից» առաջ` 2017 թվականին, ինչով էլ սոցապ նախարարությունում բացատրում են 2018թ.-ին արձանագրված թերակատարման աննախադեպ ցուցանիշը:
Աշխատաշուկայում իրավիճակ է փոխվել. գործատուները պատժո՞ւմ են աշխատանք փնտրող տեղացիներին
Իսկ մինչ այդ փոփոխությունները` 2016թ.-ին զբաղվածության կարգավորման պետական ծրագրերը, պաշտոնական տվյալներով ,նույնիսկ գերակատարվել են։ Նախատեսված 11 233-ի փոխարեն ծրագրում ընդգրկվել է 13 006 գործազուրկ:
